Një studim i fundit ka shqyrtuar efektet e një diete ketogjenike me pak karbohidrate te të rriturit që vuajnë nga depresioni rezistent ndaj trajtimit. Ky lloj depresioni përkufizohet kur simptomat nuk përmirësohen edhe pas provës së të paktën dy antidepresivëve të ndryshëm.
Rezultatet treguan se pjesëmarrësit që ndoqën dietën ketogjenike përjetuan një përmirësim më të madh të simptomave depresive krahasuar me grupin kontroll. Megjithatë, ky ndryshim u zvogëlua gjatë ndjekjes pas 12 javësh, duke sugjeruar se përfitimet e dietës keto mund të jenë afatshkurtra, shkruan burimi Medical News Today transmeton Gazeta Shneta.
Studimi, i publikuar në revistën “JAMA Psychiatry”, përfshiu 88 pjesëmarrës të moshës 18–65 vjeç, të cilët u ndanë rastësisht në dy grupe: njëri ndoqi dietën ketogjenike, ndërsa tjetri një dietë “fito”, të pasur me fruta, perime dhe yndyra të pangopura.
Grupi keto konsumonte ushqime të përgatitura me maksimum 30 gram karbohidrate në ditë. Të dy grupet morën mbështetje dhe këshillim ushqimor, dhe marrja kalorike u kontrollua për të shmangur ndikimin e humbjes në peshë e në humor.
Pas 6 javësh, të dy grupet shfaqën përmirësim të simptomave, por grupi keto pati një rënie mesatare më të madhe të pikëve të depresionit.
Rreth 25% e pjesëmarrësve në grupin keto arritën remision, krahasuar me 9% në grupin kontroll. Megjithatë, në javën e 12-të, shumë pjesëmarrës kishin ndërprerë ose ndjekur pjesërisht dietën, dhe diferencat mes grupeve u zbehën.
Studiuesit theksojnë se dieta ketogjenike mund të ofrojë një përfitim të vogël dhe të përkohshëm, veçanërisht te personat me depresion më të rëndë, por nuk përbën një zëvendësim për trajtimet standarde.
Nevojiten studime të mëtejshme për të kuptuar se kush përfiton më shumë dhe si mund të arrihen këto përfitime në mënyrë më të sigurt dhe të qëndrueshme. /Gazeta Shneta/