Dr. Miradije Hyseni është Mjekja e Javës e cila kujdeset për foshnjat e porsalindura në Qendrën Klinike Universitare të Kosovës.
Dr. Miradije Hyseni është specialiste pediatër/neonatologe në Klinikën e Neonatologjisë në QKUK, shkruan Gazeta Shneta.
Në kujdestarinë e së premtës të javës së kaluar doktoresha Hyseni ka qenë shefe e ekipës kujdestare, ku janë pranuar tetë foshnja prej të cilave gjashtë kanë qenë premature ose të lindura para kohe. Njëra nga lindjet ka qenë me fëmijë trinjakë.
Dr. Miradije Hyseni ka përvojë shumë vjeçare si specialiste dhe bashkë me ekipën e saj kanë menaxhuar me sukses gjithë fluksin e punës.
Përveç përvojës si specialiste, Hyseni ka ndjekur edhe trajnime të avancuara brenda dhe jashtë vendit për kujdesin esencial të foshnjës dhe të ushqyerit me gji; kujdesit respirator; trajnim për transportin perinatal; trajnim për përmirësimin e sistemit të kujdesit perinatal në Neë Hampshire dhe Darmouth Hitchcook Medical Center në SHBA.
Ajo njihet si mjeke e përkushtuar dhe me qasje me shumë përgjegjësi profesionale dhe empati ndaj pacientëve dhe bashkëpunëtore me kolegët.
Ndryshe Klinika e Neonatologjisë është qendër referente që ofron shërbime të nivelit primar, sekondar dhe terciar të kujdesit shëndetësor për foshnjet e porsalindura. Aty trajtohen të gjitha foshnjet që lindin në Klinikën Obstetrike Gjinekologjike dhe foshnjet me rrezik të lartë të cilat vijnë nga spitalet rajonale dhe maternitetet tjera anë e kënd Kosovës.
Klinika udhëhiqet nga Dr. Hajrije Ismaili. /Gazeta Shneta/