Një studim i fundit tregon se ekspozimi i moderuar ndaj rrezatimit diellor gjatë pranverës dhe vjeshtës mund të përmirësojë rezervën ovariane tek gratë e moshës 30-40 vjeç.
Ky studim është publikuar në revistën “Steroids”, shkruan burimi Medical News Today, transmeton Gazeta Shneta.
Hulumtuesit analizuan nivelin e hormonit anti-Müllerian (AMH), një tregues i rëndësishëm i fertilitetit femëror.
Ata zbuluan se tek gratë mbi 30 vjeç, nivelet e AMH rriteshin gjatë stinëve me rrezatim të moderuar diellor – pra në pranverë dhe vjeshtë – krahasuar me dimrin, kur rrezatimi është më i ulët.
Ky efekt nuk u vu re tek gratë nën 30 vjeç, çka sugjeron se ndikimi i diellit në fertilitet është më i dukshëm me kalimin e moshës.
Studimi u zhvillua në Izrael dhe përfshiu 2235 gra të moshës 20-40 vjeç, të ndara në dy grupe: 20-29 dhe 30-40 vjeç.
Të dhënat mbi rrezatimin diellor u siguruan nga Shërbimi Meteorologjik i Izraelit dhe analizuan periudhën katërvjeçare.
Ekspertët theksojnë se ndonëse AMH është tregues i rezervës ovariane, ai nuk pasqyron gjithmonë cilësinë e vezëve.
Megjithatë, ky zbulim mund të ndihmojë gratë që planifikojnë shtatzëninë. Kërkime të mëtejshme janë të nevojshme për të kuptuar plotësisht ndikimin klinik të diellit në fertilitet. /Gazeta Shneta/