Administrata Amerikane e Ushqimit dhe Barnave (FDA), ka miratuar një set testi që do t’i lejojë gratë të mbledhin mostrat e tyre vaginale për ekzaminimin e Humanpapilloma virusin (HPV), një veprim që mund të rrisë zbulimin e hershëm tek ato që janë në rrezik për kancerin e qafës së mitrës.
Gratë do të jenë në gjendje të marrin mostrën në privatësi dhe më pas do të dërgohet për analizë, shkruan burimi Health Day përcjell Gazeta Shneta.
Më shumë se gjysma e grave amerikane të diagnostikuara me kancer të qafës së mitrës kurrë nuk janë ekzaminuar ose ekzaminohen rrallë për virusin, tha prodhuesi i setit, kompania Roche në një njoftim për shtyp duke njoftuar miratimin e produktit.
“Me vaksinimet, mjetet novatore diagnostikuese dhe programet e shqyrtimit, arritja e qëllimit të OBSH-së për eliminimin e kancerit të qafës së mitrës deri në vitin 2030 është e arritshme”, tha CEO i komapnisë Roche Diagnostics, Matt Sause.
“Zgjidhja jonë për vetë-mbledhjen e HPV-së ndihmon në mbështetjen e këtij qëllimi duke reduktuar barrierat dhe duke siguruar akses në shqyrtimin e HPV-së duke i lejuar gratë të mbledhin privatisht mostrat e tyre për testimin e HPV-së.”
Çdo vit, rreth 11,500 gra amerikane diagnostikohen me kancer të qafës së mitrës dhe rreth 4,000 gra vdesin prej virusit, sipas Qendrave të SHBA për Kontrollin dhe Parandalimin e Sëmundjeve (CDC).
HPV është shkaktari i njohur i më shumë se 95% të kancereve të qafës së mitrës, shtoi kompania Roche.
“Pothuajse të gjitha kanceret e qafës së mitrës shkaktohen nga infeksioni i vazhdueshëm me disa lloje të HPV-së”, tha Dr. Karen Knudsen, kryetarja e Shoqatës Amerikane të Kancerit (ACS), në një deklaratë.
“Vetë-mbledhja mund të zgjerojë aksesin në depistimin dhe të reduktojë barrierat, gjë që do t’u japë më shumë grave mundësinë për të zbuluar, trajtuar dhe përfundimisht mbijetuar kancerin”. /Gazeta Shneta/