Pagliara dei Marsi, një fshat i vogël malor në rajonin Abruzzo të Italisë, ka shënuar një ngjarje të pazakontë me lindjen e foshnjës së parë pas afro 30 vjetësh. Foshnja, Lara Bussi Trabucco, ka rritur numrin e banorëve të fshatit në rreth 20 vetë dhe është pritur me entuziazëm nga komuniteti lokal.
Ceremonia e pagëzimit u mbajt në kishën përballë shtëpisë së familjes dhe u ndoq nga i gjithë fshati. Për banorët, të cilët prej dekadash nuk kishin përjetuar një lindje, ngjarja përfaqëson një shenjë shprese për të ardhmen e komunitetit, shkruan The Guardian, transmeton Gazeta Shneta.
Nëna e foshnjës, Cinzia Trabucco, 42 vjeçe, mësuese muzike, u shpërngul nga zona e Romës për t’u vendosur në fshatin e origjinës së familjes së saj, me synimin për të ndërtuar një jetë familjare larg qytetit. Partneri i saj, Paolo Bussi, 56 vjeç, punon në sektorin e ndërtimit dhe është banor i zonës.
Rasti i Pagliara dei Marsi pasqyron krizën demografike me të cilën po përballet Italia. Sipas të dhënave zyrtare, në vitin 2024 vendi regjistroi rreth 370 mijë lindje, shifra më e ulët e regjistruar ndonjëherë. Shkalla e fertilitetit ra në 1.18 fëmijë për grua, duke e renditur Italinë ndër vendet me normat më të ulëta në Bashkimin Evropian.
Rënia e lindjeve është veçanërisht e theksuar në rajone rurale si Abruzzo, ku shpopullimi dhe emigrimi i të rinjve kanë ndikuar drejtpërdrejt në plakjen e popullsisë dhe mbylljen e shërbimeve publike.
Familja e foshnjës përfitoi një bonus shtetëror prej 1,000 eurosh, si dhe një ndihmë mujore për fëmijët, në kuadër të masave të qeverisë italiane për të përballuar atë që autoritetet e cilësojnë si “dimër demografik”.
Megjithatë, ekspertët theksojnë se mbështetja financiare nuk mjafton pa investime në çerdhe, shërbime sociale dhe lehtësira për prindërit që punojnë, veçanërisht në zonat rurale ku infrastruktura është e kufizuar.
Autoritetet lokale e kanë cilësuar lindjen e Larës si një zhvillim inkurajues dhe shpresojnë se do të shërbejë si nxitje për familje të tjera që të vendosen në zonë. Megjithatë, sfidat strukturore mbeten të mëdha.
Lindja e një foshnjeje në Pagliara dei Marsi është kthyer në një simbol të qartë të sfidave demografike të Italisë dhe të nevojës për politika afatgjata që synojnë rigjallërimin e zonave rurale dhe mbështetjen e familjeve të reja. /Gazeta Shneta/