Gatimi i të paktën një vakti në shtëpi çdo javë mund të ketë ndikim të rëndësishëm në shëndetin e trurit, duke ulur rrezikun për demencë deri në 67%, sipas një studimi të ri shkencor.
Hulumtimet e mëparshme kanë treguar se përgatitja e ushqimit në shtëpi lidhet me përmirësimin e shëndetit të përgjithshëm, ndërsa studimi i fundit e zgjeron këtë lidhje edhe te shëndeti njohës, shkruan burimi Medical News Today transmeton Gazeta Shneta.
Studimi, i publikuar në “Journal of Epidemiology & Community Health”, analizoi të dhënat shëndetësore të afro 11 mijë personave mbi moshën 65 vjeç në Japoni.
Pjesëmarrësit raportuan sa shpesh gatuanin në shtëpi dhe aftësitë e tyre në kuzhinë, duke përfshirë detyra si qëruarja e frutave, zierja e vezëve apo përgatitja e pjatave bazë.
Sipas studiuesve, fokusi te gatimi në shtëpi lidhet me faktin se një pjesë e madhe e rasteve të demencës mund të parandalohet përmes ndryshimeve në stilin e jetesës, si ushqyerja dhe aktiviteti fizik.
Gatimi promovon zakone më të shëndetshme ushqimore, si konsum më i lartë i frutave dhe perimeve dhe më pak ushqime të përpunuara.
Përveç kësaj, procesi i gatimit përfshin edhe aktivitet fizik dhe angazhim mendor. Planifikimi i vakteve, përzgjedhja e përbërësve dhe ndjekja e recetave stimulojnë trurin dhe ndihmojnë në ruajtjen e funksioneve njohëse.
Rezultatet treguan se gatimi nga fillimi në shtëpi lidhej me ulje të rrezikut për demencë me 23% te burrat dhe 27% te gratë.
Ndërkohë, për personat me aftësi të kufizuara në gatim, përgatitja e një vakti të paktën një herë në javë u shoqërua me një ulje deri në 67% të rrezikut.
Studiuesit theksojnë se demenca mbetet një sfidë globale në rritje dhe identifikimi i faktorëve të modifikueshëm në stilin e jetesës është thelbësor për parandalimin dhe ruajtjen e shëndetit mendor. /Gazeta Shneta/