Oda e Stomatologëve të Kosovës ka njoftuar organizimin e Konferencës së VII-të Ndërkombëtare të Stomatologjisë, ngjarje profesionale kjo që pritet të mbledhë ekspertë të njohur nga vendi dhe jashtë tij.
Konferenca do të mbahet më 17 dhe 18 prill 2026 në Hotel Emerald, në Prishtinë, dhe do të sjellë ligjërues nga shtete të ndryshme si Turqia, Italia, Brazili, Portugalia, Kroacia dhe Shqipëria.
Sipas njoftimit, kjo konferencë synon të trajtojë “konceptet moderne në stomatologji” si dhe të fokusohet në fusha specifike si antropologjia dhe stomatologjia forenzike.
Ligjëruesit e ftuar, profesionistë me përvojë ndërkombëtare, do të prezantojnë zhvillimet më të fundit shkencore dhe praktikat bashkëkohore në këtë fushë.
Pjesëmarrësit do të kenë në dispozicion edhe programin preliminar të konferencës, ndërsa regjistrimi do të realizohet përmes platformës digjitale të OSK-së./Gazeta Shneta/