Një ngjarje e rëndë ka tronditur kryeqytetin gjerman, pasi një foshnjë e porsalindur u gjet e pajetë në lagjen Lichterfelde të Berlinit. Lidhur me rastin, autoritetet kanë arrestuar një vajzë 14-vjeçare, e cila dyshohet për përfshirje në këtë ngjarje.
Sipas Prokurorisë së Berlinit, e mitura është ndaluar pas hetimeve intensive, ndërsa detaje të tjera mbi rrethanat e rastit pritet të bëhen publike gjatë ditës, raportojnë mediat gjermane.
Ngjarja ndodhi të mërkurën paradite, rreth orës 09:37, kur shërbimet e emergjencës u njoftuan për praninë e një foshnjeje të pajetë pranë një pallati shumëkatësh në rrugën Reaumur, në zonën e Lichterfelde. Kalimtarët që e panë foshnjën njoftuan menjëherë policinë dhe ambulancën.
Megjithatë, ekipet mjekësore nuk arritën ta shpëtonin foshnjën, pasi ajo kishte vdekur përpara mbërritjes së tyre. Sipas raportimeve të mediave gjermane, foshnja dyshohet se kishte lindur vetëm pak orë më parë.
Prokuroria ka urdhëruar kryerjen e autopsisë për të përcaktuar shkakun e saktë të vdekjes.
Hetuesit dyshojnë se e mitura mund të ketë qenë në një gjendje të rënduar psikologjike në momentin e ngjarjes. Menjëherë pas zbulimit të trupit, policia kriminale rrethoi zonën dhe zhvilloi hetime të gjera, duke marrë në pyetje banorët dhe duke kërkuar informacione për një vajzë ose grua që mund të kishte qenë në fazën e fundit të shtatzënisë.
Hetimet janë në vijim, ndërsa autoritetet pritet të publikojnë informacione të reja pas përfundimit të ekzaminimeve mjeko-ligjore dhe procedurave hetimore.