Gratë që janë abuzuar fizikisht në fëmijëri kanë më shumë se dyfishin e gjasave për të zhvilluar endometriozë në moshën e rritur, sipas një studimi të ri.
Endometrioza prek rreth një në dhjetë gra në mbarë botën dhe është një sëmundje kronike gjinekologjike ku indi i ngjashëm me atë të mitrës fillon të rritet jashtë saj. Kjo gjendje shkakton dhimbje të forta gjatë ciklit menstrual dhe marrëdhënieve seksuale, si dhe simptoma të tjera si fryrje barku, lodhje, depresion, ankth dhe në disa raste, infertilitet.
Endometrioza nuk ka shërim, dhe mjekët ende nuk e kuptojnë plotësisht pse disa gra preken nga kjo sëmundje. Por studimi i ri, i publikuar në revistën “Human Reproduction”, ndihmon në identifikimin e grave që janë në rrezik më të lartë.
Studiuesit analizuan të dhënat e më shumë se 1.3 milionë grave të lindura në Suedi midis viteve 1974 dhe 2001, prej të cilave mbi 24 mijë ishin diagnostikuar me endometriozë, raporton Euronews Health transmeton Gazeta Shneta.
Rezultatet treguan se gratë që kishin kaluar fëmijëri të vështirë apo traumatike kishin 20% më shumë gjasa për të zhvilluar endometriozë — dhe sa më shumë përvoja të vështira të kishin, aq më i lartë ishte rreziku.
Këto përvoja mund të përfshijnë: të kesh një prind me sëmundje mendore, varësi nga substancat, vështirësi financiare apo aftësi të kufizuara intelektuale; të kesh një prind adoleshent; ose të jesh dëshmitar apo viktimë e dhunës ose abuzimit seksual.
Gratë që kishin përjetuar dhunë apo abuzim seksual gjatë fëmijërisë kishin rrezikun më të lartë për të zhvilluar endometriozë, zbuloi studimi.
Ndërkaq, ato që kishin raportuar pesë ose më shumë përvoja të vështira kishin një rrezik 60% më të lartë për endometriozë, krahasuar me gratë që kishin kaluar një fëmijëri pa trauma.
“Rezultatet sugjerojnë se përjetimet në fillim të jetës mund të ndikojnë në shëndetin e trupit shumë më vonë dhe theksojnë rëndësinë e shikimit të njeriut si tërësi, jo vetëm të simptomave,” tha Dr. Marika Rostvall, bashkautore e studimit dhe hulumtuese në Institutin Karolinska në Suedi. /Gazeta Shneta/