Rregullatori i barnave në Mbretërinë e Bashkuar ka paralajmëruar që të gjitha gratë që marrin injeksione për humbje peshe duhet të sigurohen se po përdorin një formë efektive të kontracepsionit, ndërsa gratë shtatzëna duhet të ndalojnë menjëherë përdorimin e këtyre barnave.
Sipas Agjencisë së Rregullimit të Produkteve të Mjekësisë dhe Kujdesit Shëndetësor në Mbretërinë e Bashkuar (MHRA), gratë nuk duhet të përdorin barna për humbje peshe gjatë shtatzënisë për shkak të shqetësimeve që ato po përdoren në mënyra të pasigurta. Po ashtu, barnat nuk duhet të përdoren gjatë gjidhënies ose nëse një grua po përpiqet të mbetet shtatzënë, pasi nuk ka të dhëna të mjaftueshme mbi sigurinë për ndikimin e mundshëm te foshnja, raporton Euronews Health përcjell Gazeta Shneta.
“Kushdo që mbetet shtatzënë gjatë përdorimit të këtyre barnave duhet të kontaktojë menjëherë mjekun dhe ta ndalojë marrjen e barit sa më parë,” thuhet në njoftimin e agjencisë.
Ndërkohë, të gjitha gratë që përdorin injeksionet për dobësim duhet të sigurohen se janë të mbrojtura me një metodë të besueshme kontracepsioni.
Sipas MHRA, një nga barnat, Mounjaro, mund ta bëjë më pak efektiv përdorimin e pilulave kontraceptive, prandaj rekomandohet përdorimi i metodave jo orale, si implantet apo pajisjet intrauterine (IUD).
“Obeziteti e zvogëlon fertilitetin te gratë. Prandaj, gratë me obezitet që përdorin barna GLP-1 kanë më shumë gjasa të mbeten shtatzënë pasi të kenë humbur peshën,” tha në një deklaratë Dr. Channa Jayasena, studiues i endokrinologjisë riprodhuese në Imperial College London.
“Grave u rekomandohet të bëjnë gjithçka që munden për të shmangur shtatzëninë gjatë kohës që marrin këto barna,” shtoi ai. /Gazeta Shneta/