Instituti Kombëtar i Shëndetësisë Publike të Kosovës (IKShPK) u ka bërë thirrje qytetarëve që të tregojnë kujdes të shtuar gjatë ditëve me temperatura të larta, duke zbatuar masat bazë për mbrojtjen e shëndetit.
Instituti rekomandon që qytetarët të pinë ujë rregullisht për të shmangur dehidratimin, të konsumojnë ushqime të lehta dhe të freskëta, si dhe të shmangin pijet alkoolike dhe ato me përmbajtje të lartë sheqeri, përcjell Gazeta Shneta.
Po ashtu, këshillohet veshja me rroba të lehta dhe freskimi i trupit me ujë për të përballuar më lehtë vapën dhe për të zvogëluar rrezikun nga goditja e të nxehtit.
IKShPK u bën thirrje qytetarëve, veçanërisht të moshuarve, fëmijëve dhe personave me sëmundje kronike, që të kujdesen për shëndetin e tyre gjatë kësaj periudhe me temperatura të larta.