Spitalet në disa vende evropiane po raportojnë një rritje të ndjeshme të numrit të pacientëve që paraqiten në repartet e urgjencës si pasojë e valëve intensive të të nxehtit që kanë përfshirë kontinentin.
Mjekët po trajtojnë gjithnjë e më shumë raste me dehidrim, goditje nga nxehtësia, rraskapitje termike dhe përkeqësim të sëmundjeve kronike, veçanërisht atyre kardiovaskulare dhe të frymëmarrjes, shkruan The Guardian, transmeton Gazeta Shneta.
Sipas autoriteteve shëndetësore, temperaturat shumë të larta rrisin ngarkesën mbi organizmin, duke e bërë më të vështirë rregullimin e temperaturës së trupit. Kjo mund të çojë në komplikime serioze, sidomos te të moshuarit, foshnjat dhe fëmijët e vegjël, gratë shtatzëna, si dhe personat me sëmundje kronike ose ata që marrin medikamente që ndikojnë në ekuilibrin e lëngjeve në organizëm.
Në disa vende evropiane janë aktivizuar plane emergjente për përballimin e fluksit të pacientëve. Spitalet kanë rritur gatishmërinë e personelit, ndërsa autoritetet lokale kanë hapur qendra të freskëta për qytetarët dhe kanë intensifikuar monitorimin e personave më të rrezikuar. Gjithashtu, shërbimet e emergjencës po u bëjnë thirrje qytetarëve të kontaktojnë menjëherë ndihmën mjekësore në rast se shfaqen simptoma si temperaturë shumë e lartë trupore, konfuzion, humbje e vetëdijes ose vështirësi në frymëmarrje.
Ekspertët rekomandojnë shmangien e ekspozimit në diell gjatë orëve më të nxehta të ditës, konsumimin e rregullt të ujit, veshjen e rrobave të lehta dhe kontrollin e shpeshtë të familjarëve të moshuar ose personave që jetojnë vetëm. Ata theksojnë se valët e të nxehtit përbëjnë një rrezik serioz për shëndetin publik dhe kërkojnë masa parandaluese si nga autoritetet, ashtu edhe nga qytetarët. /Gazeta Shneta/