Inspektorati Shëndetësor ka gjetur një subjekt privat duke kryer shërbime shëndetësore pa licencë, si dhe ia ka ndaluar punën një mjeku nga Turqia i cili poashtu ishte i pa licencuar.
Inspektorati Shëndetësorë i Ministrisë së Shëndetësisë më datën tetë nëntor ka zbarkuar në një institucion privat të quajtur “SuperNova Healthcare LLC”, shkruan Gazeta Shneta.
Arsyeja e zbarkimit të Ish-së ishte se ky institucion kryente shërbime shëndetësore pa licencë dhe gjithashtu kishte mjek të huaj të pa licencuar. Kështu ka bërë të ditur ISh në një deklaratë për Gazetën.
“Gjatë inspektimit në hapësirën e marrë me qira nga subjekti, e cila ishte e destinuar vetëm ‘për konsulta’, u konstatua se një profesionist i huaj, Dr. Veysel Antar, po ofronte shërbime shëndetësore pa licencë/vendim të lëshuar nga Ministria e Shëndetësisë, të vlefshme për ushtrimin e veprimtarisë shëndetësore në Republikën e Kosovës, sipas legjislacionit në fuqi. Po ashtu, u konstatua se subjekti nuk posedonte licencë për ushtrimin e veprimtarisë përkatëse”, thuhet në deklaratë.
Me këtë rast Inspektorati ia ka ndaluar ofrimin e shërbimeve mjekut nga Turqia, ndërsa është mbyllur edhe institucioni.
“Në bazë të gjetjeve, profesionistit të huaj, Dr. Veysel Antar, i është ndaluar ofrimi i shërbimeve shëndetësore deri në pajisje me vendim/licencë në përputhje me legjislacionin e Republikës së Kosovës. Po ashtu, subjektit i është vendosur shenja për ndërprerje të përkohshme të veprimtarisë deri në pajisjen me licencën përkatëse, sipas procedurave ligjore”, kanë deklaruar nga Inspektorati.
Gazeta i ka dërguar pyetje edhe institucionit, por të njëjtit nuk janë përgjigjur përmes adresës elektronike. /Gazeta Shneta/