Inspektorati Shëndetësor ka filluar dje pasdite hetimet në Klinikën e Gjinekologjisë për rastin e gruas shtatzënë e cila u vra të mërkurën në oborrin e klinikës.
Inspektorati Shëndetësor ka konfirmuar se janë duke hetuar rastin e gruas shtatzënë në Klinikën e Gjinekologjisë, e cila u vra të mërkurën mbrëma nga ish-bashkëshorti i saj, shkruan Gazeta Shneta.
“Inspektorati Shëndetësor me të marrë informatën është duke kryer të gjitha veprimet në kuadër të kompetencave me këtë rast, janë duke u kryer edhe inspektime në Klinikën e Gjinekologjisë”, thuhet në përgjigjen e ISH-së përmes zyrës për media të Ministrisë së Shëndetësisë.
Gazeta ka mësuar se hetimet e ISH-së kanë filluar dje pasdite, por për këtë çështje nuk kanë dhënë përgjigje nga ky institucion.
Nga MSH kanë deklaruar se Inspektorati Shëndetësor do të ofroj gjithë asistencën e nevojshme profesionale organeve hetuese të rastit nëse kërkohet një e tillë.
“Pas përfundimit te inspektimit lidhur me këtë rast, pas grumbullimit të fakteve dhe analizimit të tyre do të përpilohet raporti dhe patjetër do të njoftohet edhe U.D Ministrja e Shëndetësisë”, thuhet në përgjigje.
Hamide Magashi ishte në javën e fundit të shtatzënisë. Ajo ishte hospitalizuar në Gjinekologji ku priste t’i nënshtrohej lindjes. Magashi u vra bashkë me foshnjën e saj nga ish-bashkëshorti të mërkurën rreth orës 18:00.
Gazeta dje ka raportuar për intervenimin e Qendrës së Mjekësisë Urgjente të komunës së Prishtinës në këtë rast ku ekipa mjekësore e kësaj qendre kishte konstatuar vdekjen në ora 18:23. Ndërkaq nga SHSKUK nuk kanë dhënë sqarime pse mjekët e QKUK-së nuk kishin intervenuar në këtë rast. /Gazeta Shneta/