Pasi nuk arriti të zgjidhej drejtor me konkurs, Sami Tahiraj është emëruar ushtrues detyre në të njëjtën pozitë për Infermieri në QKUK ku garoi bashkë me 13 infermierë të tjerë
Në muajin shkurt të këtij viti u hap konkursi për drejtor të Shërbimit të Infermierisë në Qendrën Klinike Universitare të Kosovës. Kësaj pozite ia mësynë 14 infermierë, nga të cilët nëntë e kaluan testin me shkrim për të hyrë në intervistën me gojë.
Pas fazës së fundit, fituese doli Shpresa Surdulli me 377 pikë e pasuar nga Sami Tahiraj me 363 pikë. Por ndonëse Tahiraj nuk arriti të zgjidhej me konkurs, ai tanimë është emëruar në këtë pozitë si ushtrues detyre nga drejtori i përgjithshëm i SHSKUK-së Dr. Basri Sejdiu. Ky i fundit e mori këtë vendim pasi përzgjedhja e Surdullit u anulua nga Inspektorati i Punës.
Burime të Gazetës Shneta bëjnë të ditur se Inspektorati ka marr këtë vendim me arsyetimin se Surdulli nuk ka përvojë në pozitën e drejtorit, ndonëse ky kriter nuk është marr parasyshë për pozita të tjera sikurse në rastet e disa drejtorëve të klinikave.
E SHSKUK nuk e ka dërguar fare vendimin e Inspektoratit në shkallën e dytë, por të njëjtin e ka pranuar dhe e ka implementuar menjëherë. Pas anulimit të konkursit, Sejdiu konform kompetencave të tij si drejtor ka emëruar Tahirajn ushtrues detyre në pozitën ku e kishte humbur garën në konkurs.
“Ju njoftojmë se pas Vendimit të Inspektoratit të Punës, është anuluar konkursi për pozitën drejtor i Shërbimit të infermierisë QKUK. Pas anulimit drejtori i përgjithshëm, konform legjislacionit në fuqi ka caktuar një ud. drejtor të infermierisë deri në ri shpalljen e konkursit”, ka deklaruar SHSKUK në përgjigjen zyrtare për Gazetën.
Por Tahiraj është paraqitur në krye të infermierëve edhe para këtij vendimi për ud. Ai shihet në ceremoninë e organizuar nga SHSKUK për pranimin e 100 infermierëve në punë.
Tahiraj punon në Klinikën e Psikiatrisë në QKUK. /Gazeta Shneta/