Italia ka konfirmuar rastin e parë në Evropë të infektimit njerëzor me gripin e shpendëve A(H9N2). Rasti u identifikua në rajonin e Lombardisë tek një person që kishte udhëtuar nga jashtë kontinentit dhe aktualisht ndodhet në spital në izolim, duke marrë trajtim.
Sipas Ministrisë italiane të Shëndetësisë, janë kryer menjëherë të gjitha kontrollet e nevojshme dhe janë identifikuar kontaktet e pacientit në kuadër të masave rutinë të parandalimit dhe monitorimit. Pacienti kishte edhe probleme të tjera shëndetësore bashkëshoqëruese, raporton Euronews Health transmeton Gazeta Shneta.
Ky është rasti i parë i këtij lloji në Evropë, megjithëse globalisht virusi nuk është i panjohur.
Sipas Qendrës Evropiane për Parandalimin dhe Kontrollin e Sëmundjeve (ECDC) që nga viti 1998 deri në shkurt 2026 janë raportuar 195 raste njerëzore në Azi dhe Afrikë. Megjithatë, nuk është vërejtur transmetim nga njeriu te njeriu për këtë variant.
Infeksioni zakonisht ndodh përmes kontaktit të drejtpërdrejtë me shpendë të infektuar ose mjedise të kontaminuara. Raste të tilla sporadike konsiderohen të pritshme në zona ku virusi qarkullon tek kafshët.
Në raportin më të fundit të Autoritetit Evropian për Sigurinë Ushqimore dhe ECDC, u raportuan 10 raste njerëzore të gripit të shpendëve midis nëntorit 2025 dhe shkurtit 2026, kryesisht në Kamboxhia dhe Kina, pa asnjë rast fatal.
Autoritetet vlerësojnë se rreziku aktual për popullsinë në Bashkimin Evropian dhe Zonën Ekonomike Evropiane mbetet shumë i ulët. /Gazeta Shneta/