Mund të kuptohet lehtësisht kur një femër është shtatzënë, për shkak të ndryshimeve të shumta që ndodhin në trupin e saj. Megjithatë, ka raste kur femrat nuk e kuptojnë se kanë ngelur shtatzënë.
Ndodh që disa gra të kalojnë 40 javë pa e kuptuar se po presin një bebe. Një fenomen të tillë mjekët e kanë cilësuar si “shtatzënia e fshehtë”. Ja pse ndodh një fenomen i tillë.
Për shkak të shtimit të madh në peshë
“Femrat që janë mbipeshë ose obeze nuk i dallojnë domosdoshmërisht ndryshimet fizike kur fëmija rritet brenda tyre. Shtresat e tepërta të dhjamit mund të bëjnë që ato të mos i ndjejnë lëvizjet e fëmijës në bark,” thotë Mary Jane Minkin, profesore klinike e obsetrikës dhe gjinekologjisë në ‘Yale School of Medicine’, shkruan Shendeti.
Menstruacionet janë gjithmonë të çrregullta
“Nëse keni menstruacione të çrregullta, për shkak të kimisë së trupit apo të Sindromës Ovariane Policistike, nuk duhet të mendoni me patjetër se jeni shtatzënë”, thotë doktoresha Minkin.
Testet e shtatzënisë nuk janë 100% të sakta
Megjithëse mundësitë që testet të gabojnë janë të vogla (sipas Minkin 1%), ka raste që edhe ndodh një gjë e tillë, sidomos nëse keni pirë shumë ujë para testit, nëse në momentin që është bërë testi trupi juaj nuk ka prodhuar mjaftueshëm hormone sa ai t‘i dallojë, ose nëse e keni përdorur testin gabim. Minkin sugjeron që nëse keni shenja shtatëzanie, si të vjella apo marramendje, duhet të bëni testin disa herë për të qenë më të sigurt.
Rritja e bebit është shumë e qetë
“Është normale që fëmija të fillojë të lëvizë sidomos në tremujorin e tretë, por jo të gjithë fëmijët e bëjnë këtë,” thotë Minkin. Ndodh që edhe fëmija të lëvizë, por për shkak placentës që ndodhet para fëmijës, nëna nuk arrin t’i ndjejë lëvizjet e tij.
Shenjat e shtatzënisë ngatërrohen me ato të perimenopauzës
Nga fundi i të dyzetave, shumë femra përjetojnë një shtyrje të ciklit, e njohur si perimenopauza: menstruacione të çrregullta, në rastet kur menstruacionet ndalen për disa muaj dhe vijnë sërish. Nëse vëreni ndryshime në trup, si shtim në peshë apo keni luhatje humori, mund të jenë shenja të shtatzënisë. Minkin thotë se kjo ka ndodhur me një pacienten e saj që ishte 46 vjeçe, e cila ankohej për shtimin në peshë ndërkohë që ishte shtatëzënë në tremujorin e dytë.
Keni probleme me stomakun
Nëse keni pasur gjithmonë probleme me stomakun, si përzierje, vjellje, fryrje, me siguri që nuk mund ta vini re kur jeni shtatzënë.