Ja si ndryshon jeta seksuale e një çifti shqiptar pas lindjes së fëmijës

2018-07-13 në ora 07:48

Ardhja në jetë e një fëmije, është bekimi më i madh për një çift të dashuruarish. Por, së bashku me këtë ngjarje që ndryshon përgjithmonë jetën e prindërve të rinj, vijnë edhe disa episode sa të gëzueshme, stresuese, të frikshme, e të gjitha këto ndjesi mpleksen bashkë për t’jua bërë çdo ditë të re edhe më të paparashikueshme.

Megjithëkëtë, një nga gjërat që thelbësisht ndryshon mes dy partnerëve, është pikërisht raporti mes të dyve. Pikëpyetjet e shumta, dilemat, një lloj “ftohje” që nëse vazhdon gjatë kthehet në një terren të minuar për martesën.

Ndaj, revista “Class” ka cekur disa nga këto ndryshime, ndër më thelbësoret, duke u nisur edhe nga përvoja personale. Të gjitha vajzat dhe djemtë e bërë prindër rishtas të mblidhen këtu dhe të na tregojnë se a kemi qëlluar në shenjë me këto piketime që ne kemi bërë! Jeni gati?

Ndryshimi është i pashmangshëm dhe shpesh nuk thuhet me zë: Nëse dikush ju thotë se martesa e tyre nuk ka ndryshuar pasi janë bërë prindër, me siguri nuk janë të sinqertë me ju. Nuk jeni më vetëm ju të dy, por ti, bashkëshorti dhe fëmija. Statusi i prindit do ju ndryshojë edhe juve si njerëz, do jeni më të vetdijshëm, më të dhimbsur, pasi e gjithë bota juaj rrotullohet rreth kësaj qenieje të pafuqishme që ka nevojë gjithë kohës për ju. Pranojeni këtë ndryshim të ri në jetën tuaj dhe bëni pakt me të njëherë e përgjithmonë.

Mund të urreni partnerin tuaj

Jeni në një fluks hormonesh, me ndryshime të jashtëzakonshme, që nisin nga të qarat e bebit/es deri tek ushqyerja me gji, ndërkohë që shpesh burri është aty para syve tuaj dhe nuk ju ofron asnjë ndihmë. Ju mund ta përbuzni atë për faktin se jeta e partnerit nuk ka ndryshim të madh që prej lindjes së fëmijës, por kjo ndodh edhe për shkak të mungesës së përvojës në këtë drejtim. Mund të ketë ngritje zëri, debate të forta, por kjo nuk do të thotë se po shkoni drejt divorcit. Hormonet tuaja kanë dalë nga ekuilibri, mungesa e gjumit bën të vetën, por ky është thjesht depresioni post partum. E dinit apo jo?

Seksi? Tashmë, i takon të kaluarës suaj: Ne e dimë! Nuk është klishe! Jeta seksuale pas lindjes së fëmijës së parë, ndryshon katërcipërisht. Dhe juve ju mbetet të jetoni thjesht me kujtimet e së shkuarës, me kohët e arta. Mund të prisni edhe javë, e muaj të tërë pa pasur raport seksual me njëri-tjetrin. Lodhja, stresi, mungesa e gjumit, ndryshimi i disponibilitetit, nuk janë assesi në favor të gjendjes suaj optimale shpirtërore, në mënyrë që të keni një raport të kënaqshëm seksual. Ndaj, mos e nxitoni veten. Gjithçka do të vijë në kohën e duhur.

Ju e doni beben tuaj, më shumë se burrin: Para se të kishit foshnjen tuaj në krah, nuk e ndjenit distancën nga njëri-tjetri, ndërsa me lindjen e fëmijës praktikisht jeni më larg se kurrë. Sepse i gjithë fokusi është tek pjesëtari më i ri i familjes. Zgjidhja? Mundohuni që të mos lejoni një person tjetër të hyjë në mesin tuaj. Edhe pse jeni të çmendur pas fëmijës, mirë është që të mos e lëndoni njëri-tjetrin për shkak të tij/saj. Vëreni në funksion dashurinë tuaj të përbashkët për fëmijën që rritet mes jush.

Gjyshërit, do i shihni më shpesh në shtëpinë tuaj: Lindja e një fëmije është një ngjarje, sidomos kur bëhet fjalë për shoqërinë shqiptare. Traditat dhe historia jonë ndër vite ka dëshmuar, se ne shqiptarët jemi më të afërt dhe bëjmë shumë për familjen, ndryshe nga bota që përcakton kufijtë dhe hapësirat e ndërveprimit të çdo pjesëtari. Por, me ardhjen në jetë të foshnjes së parë, bëhuni gati që t’i shikoni më shpesh pranë jush gjyshërit e të dyja palëve. Mos u habisni madje, kur ata të tentojnë të bëjnë ligjin në shtëpinë tuaj. Nuk ka qëllime dashakeqe në këtë mes, sepse gjithçka nis nga bonsensi dhe dashuria për më të voglin e familjes, por duke u përpjekur të duken protektivë, të dashur, të kujdesshëm deri në tepri, gjyshërit shqiptarë nuk e kuptojnë dot kapërcimin e atij kufiri që i bën ata nga shumë të kujdesshëm në shumë të bezdisur. Ndaj, bëni kujdes!

Paratë, llogaritë tuaja bankare me minus: Mos kini pikën e dyshimit! Qysh prej ngjizjes deri në daljen në jetë, fëmija është vetëm çështje investimi për ju. Pa i faturuar kësaj, edhe vitet më tutje, kopësht, shkollë, studime, veshje, argëtim, etj. Ndaj, kur të shihni që në fund të muajit mund të kërkoni lekë borxh, apo të shihni që llogaritë bankare janë zbrasur, mos u çudisni aspak! Ktheni sytë nga fëmija juaj dhe do ta kuptoni se ai/ajo është arsyeja e të gjithë këtyre ndryshimeve.

Kliko këtu për t’u informuar me testin që duhet ta bëjë secila nënë shtatzënë për të konfirmuar se shëndeti gjenetik i foshnjës në ardhje është në rregull.