Joga prenatale është një praktikë e dobishme për mirëqenien fizike dhe emocionale gjatë shtatzënisë. Mes tjerash, ndihmon trupin të përshtatet me ndryshimet që ndodhin, forcon muskujt e pjesës së poshtme të trupit dhe lehtëson mbajtjen e barkut në rritje. Po ashtu, tonifikon muskujt e legenit dhe përgatit trupin për lindje.
Frymëmarrja e thellë dhe e ndërgjegjshme, e mësuar përmes jogës, ndihmon në relaksimin e trupit dhe përballimin më të lehtë të procesit të lindjes. Kjo teknikë ul tensionin, zvogëlon frikën dhe ndihmon gruan të qëndrojë e qetë gjatë lindjes, shkruan burimi Parents përcjell Gazeta Shneta.
Një përfitim tjetër i rëndësishëm është lehtësimi i shqetësimeve të zakonshme si dhimbjet e shpinës, të përzierat, pagjumësia apo gulçimi. Joga ndihmon qarkullimin e gjakut dhe rrit furnizimin me oksigjen për nënën dhe foshnjën.
Përveç përfitimeve fizike, joga prenatale krijon një hapësirë për lidhje me fëmijën dhe vetveten. Pjesëmarrja në klasë është një kujtesë për të ndalur dhe për t’u përqendruar tek lidhja me beben. Ajo gjithashtu ofron mundësi për t’u njohur me nëna të tjera dhe për të ndarë përvoja të përbashkëta.
Studimet tregojnë se gratë që praktikojnë joga gjatë shtatzënisë kanë më pak rrezik për lindje të parakohshme ose për të pasur një fëmijë me peshë të ulët. Në këtë mënyrë, joga prenatale kontribuon në një shtatzëni më të shëndetshme dhe më të lumtur. /Gazeta Shneta/