Joga Kundalini – një shumëllojshmëri e jogës që përqendrohet më shumë në meditim dhe frymëmarrje sesa në qëndrime fizike – ofron përfitime kognitive (njohëse) për gratë pas menopauzës në rrezik të zhvillimit të sëmundjes Alzheimer, ka zbuluar një studim i ri.
Yoga Kundalini ofron disa përfitime kognitive (njohëse) dhe të kujtesës për gratë e moshuara që janë në rrezik të Alzheimerit, duke përfshirë rivendosjen e rrugëve nervore, parandalimin e rënies së lëndës së trurit dhe ndikimin në biomarkerë të lidhur me plakjen dhe inflamacionin sipas një studimi të ri, shkruan burimi Health News përcjell Gazeta Shneta.
Studimi i botuar në “Translational Psychiatry”, zbuloi se joga është më efektive në ofrimin e këtyre përfitimeve sesa trajnimi tradicional për përmirësimin e kujtesës.
“Kjo është ajo për të cilën joga është e mirë – për të reduktuar stresin, për të përmirësuar shëndetin e trurit, performancën e kujtesës subjektive dhe për të reduktuar inflamacionin dhe për të përmirësuar neuroplasticitetin,” tha autorja kryesore e studimit dhe psikiatrja e UCLA Health, Dr. Helen Lavretsky.
Meqenëse gratë kanë rreth dyfishin e rrezikut të zhvillimit të sëmundjes së Alzheimerit në krahasim me burrat, studiuesit në UCLA kanë kryer një sërë studimesh që krahasojnë jogën me ushtrimet tradicionale të kujtesës në një përpjekje për të përcaktuar se cila ka ndikimin më të madh në ngadalësimin e rënies njohëse tek gratë.
Nga 6.2 milionë njerëz me sëmundjen Alzheimer që janë 65 vjeç ose më të vjetër në Shtetet e Bashkuara, pothuajse dy të tretat janë gra, sipas burimit Harvard Health, kryesisht për shkak se gratë jetojnë më gjatë se burrat.
Për të kryer këtë studim, studiuesit ndanë një grup grash në postmenopauzë të moshës 50 vjeç e sipër me probleme të vetë-raportuara të kujtesës dhe faktorë të rrezikut cerebrovaskular në dy grupe: një që bënte seanca javore yoga Kundalini për 12 javë dhe një që në vend të kësaj mori pjesë në trajnime javore për përmirësimin e kujtesës. Gjithsej 63 pjesëmarrës përfunduan të gjithë studimin.
Pas 12 javëve të para, studiuesit vlerësuan njohjen dhe kujtesën subjektive të pjesëmarrësit dhe ata vlerësuan këta faktorë për herë të dytë pas 24 javësh.
Mes tjerash, studiuesit morën mostra gjaku nga pjesëmarrësit për të testuar për ekspresionin e gjeneve të shënuesve të plakjes dhe për molekulat që lidhen me inflamacionin.
Një grup i vogël pacientësh u ekzaminuan gjithashtu me MRI në fillim dhe më pas përsëri pas 12 javësh.
Rezultatet treguan se pjesëmarrësit në grupin e jogës përjetuan përmirësime që grupi tjetër nuk i kishte, duke përfshirë një reduktim të ankesave të kujtesës subjektive, parandalimin e rënies së materies së trurit, rritjen e lidhjes në hipokampus, e cila është thelbësore për konsolidimin dhe rikthimin e kujtesës afatgjate si dhe përmirësim në citokinat periferike dhe ekspresionin e gjeneve të molekulave anti-inflamatore dhe anti-plakjes.
“Joga ka këtë efekt neuroplastik të trurit anti-inflamator, reduktues të stresit, kundër plakjes, i cili do të ishte plotësues i trajnimit të kujtesës”, tha Dr. Lavretsky. /Gazeta Shneta/