Më 7 janar 2026, Departamenti Amerikan i Shëndetësisë (HHS) dhe ai i Bujqësisë (USDA) publikuan Udhëzimet e reja Ushqimore për Amerikanët 2025–2030, të bazuara në parimin “hani ushqim të vërtetë”. Këto udhëzime zëvendësojnë versionin 2020–2025 dhe sjellin një qasje të re ndaj piramidës ushqimore, duke theksuar cilësinë e ushqimit mbi sasinë.
Ndryshimi i parë lidhet me rritjen e rolit të proteinave dhe yndyrnave të shëndetshme, ndërsa drithërat e plota zënë një vend më të vogël. Ekspertët theksojnë se proteinat janë të rëndësishme për muskujt, metabolizmin dhe ndjenjën e ngopjes, por paralajmërojnë se burimi i tyre ka rëndësi, shkruan burimi Medical News Today transmeton Gazeta Shneta.
Një dietë e balancuar duhet të përfshijë edhe karbohidrate cilësore, si frutat, perimet, bishtajoret dhe drithërat e pasura me fibra.
Ndryshimi i dytë fokusohet te yndyrnat: rekomandohet ulja e yndyrnave të ngopura nën 10% të kalorive ditore dhe preferimi i produkteve të qumështit me yndyrë të plotë, pa sheqerna të shtuar.
Studimet sugjerojnë se këto produkte janë më ngopëse dhe jo domosdoshmërisht të dëmshme për zemrën, nëse konsumohen me masë.
Ndryshimi i tretë është thirrja e fortë për të shmangur ushqimet shumë të përpunuara, të pasura me kripë, sheqer dhe yndyrna jo të shëndetshme, të cilat lidhen me sëmundje kronike.
Ndryshimi i katërt synon kufizimin maksimal të sheqernave të shtuara. Edhe pse reduktimi i tyre është i rëndësishëm për shëndetin publik, specialistët theksojnë se qasja duhet të jetë graduale dhe realiste, duke edukuar dhe mbështetur njerëzit në zgjedhje më të shëndetshme afatgjata. /Gazeta Shneta/