Kolegji i Kirurgëve të Kosovës i cili udhëhiqet nga Rifat Latifi, i ka kërkuar Ministrisë së Shëndetësisë e cila po ashtu udhëhiqet nga Latifi, 25 mijë Euro për organizimin e Kongresit Klinik. Kjo kërkesë është refuzuar nga MSH
Kolegji i Kirurgëve të Kosovës i cili udhëhiqet nga ministri i Shëndetësisë Rifat Latifi para dy javësh ka mbajtur Kongresin e Dytë Klinik. Për ta organizuar këtë kongres, Kolegji i kishte kërkuar Ministrisë së Shëndetësisë mbështetje financiare në vlerë 25 mijë Euro, shkruan Gazeta Shneta.
Kërkesën për këto para e kanë konfirmuar nga Ministria e Shëndetësisë të cilët kanë bërë të ditur poashtu se kërkesa është refuzuar.
“Ju njoftojmë se Kolegji i Kirurgëve të Kosovës ka kërkuar mbështetje financiare nga Ministria e Shëndetësisë, mirëpo kjo kërkesë nuk është aprovuar”, thuhet në përgjigjen e MSH-së.
Kërkesa është konfirmuar edhe nga Kolegji, por këta kanë deklaruar se ende nuk kanë marr përgjigje nga MSH. “Jo, nuk kemi marrur asnjë përgjigje”, thuhet në përgjigjen e Kolegjit.
Ata kanë thënë se kërkesa të ngjashme kanë dërguar edhe në disa organizata tjera, me qëllim për të mbuluar koston e organizimit të kongresit.
Sipas tyre ende nuk dihet sesa ka qenë kostoja totale e këtij organizimi. “Akoma jemi ne proces te mbledhjes se te gjitha shpenzimeve. Sdq, nje pjese e madhe e shpenzimeve eshte mbuluar nga Oda e Mjekeve te Kosoves, si bashkeorganizatore e Kongresit”, është thënë në përgjigjen elektronike nga Kolegji. /Gazeta Shneta/