Një studim i ri ndërkombëtar sugjeron se ushqimet që konsumohen gjatë shtatzënisë mund të ndikojnë në preferencat ushqimore të fëmijëve vite më vonë.
Sipas hulumtimit, fëmijët reaguan më pozitivisht ndaj aromave të perimeve me të cilat kishin qenë të ekspozuar që në barkun e nënës.
Studimi u realizua nga studiues në universitete në Mbretëria e Bashkuar, Francë dhe Holandë.
Në kuadër të hulumtimit, grave shtatzëna iu dhanë kapsula me pluhur lakre jeshile ose karote. Më pas, studiuesit analizuan reagimet e fetusit përmes ultrazërit në javën e 32-të dhe të 36-të të shtatzënisë.
Fëmijët u monitoruan sërish pas lindjes, ndërsa faza më e fundit e studimit u realizua kur ata arritën moshën trevjeçare.
Studiuesit përdorën shtupa pambuku të lagura me aromë karote ose lakre, të cilat u afruan pranë hundës së fëmijëve për të vëzhguar reagimet e tyre.
Rezultatet treguan se fëmijët që kishin qenë të ekspozuar ndaj aromës së karotës gjatë shtatzënisë reaguan më pozitivisht ndaj saj edhe në moshën trevjeçare, ndërsa kishin reagime më negative ndaj lakrës. Një model i ngjashëm u vu re edhe te fëmijët e ekspozuar ndaj lakrës.
Autorja kryesore e studimit, Nadja Reissland, tha se ekspozimi ndaj aromave të caktuara në fund të shtatzënisë mund të krijojë kujtesë afatgjatë për aromat dhe shijet te fëmijët.
Sipas saj, kjo mund të ndikojë në preferencat ushqimore të tyre edhe vite pas lindjes dhe mund të ndihmojë prindërit në inkurajimin e konsumimit të perimeve.
Megjithatë, studiuesit theksuan se studimi është realizuar me një numër të vogël pjesëmarrësish dhe nevojiten kërkime të tjera për të kuptuar më mirë ndikimin e këtyre faktorëve në zakonet ushqimore të fëmijëve.