Është thënë se në mungesë të katër zyrtarëve të Departamentit për regjistrimin e barnave, të jetë pezulluar përkohësisht vendimi mbi regjistrimin e barnave në vend.
Ka tri javë që në Agjencinë e Barnave të Kosovës nuk është shqyrtuar asnjë aplikacion për regjistrimin e produkteve mjekësore raporton Koha.
Mungesa e katër zyrtarëve në Departamentin për regjistrimin e barnave, sipas kryeshefit të këtij institucioni, ka bërë që kjo agjenci të marrë një vendim të tillë përcjell Gazeta Shneta.
Hyrja në fuqi e Ligjit për zyrtarët publikë ka pamundësuar gjithashtu që ky institucion të hapë konkurs për këto pozita.
Kryeshefi i AKPPM-së, Ardian Rugova thotë se bazuar në ligjet në fuqi do të shikojnë që të gjejnë një zgjidhje të përkohshme, transferimin e disa zyrtarëve për një periudhë të caktuar, por që, sipas tij, nëse institucionet nuk gjejnë zgjidhje më afatgjate atëherë ata do të përballen me probleme të mëdha sa i përket regjistrimit të barnave në vend.
Distributorët e kompanive farmaceutike në vend thonë të jenë të shqetësuar me këtë vendim të AKPPM-së.
Sipas tyre, me këtë vendim mund ketë tërheqje të kompanive të mëdha farmaceutike, derisa thanë se për këto ditë sa është bllokuar ky proces janë rreth 300 produkte mjekësore që kanë mbetur pa u regjistruar.
KTV-ja ka kërkuar përgjigje edhe nga Ministria e Shëndetësisë lidhur me këtë çështje, por që zyrtarët e kësaj ministrie kanë thënë se për këtë temë duhet të flitet me zyrtarët e Agjencisë së Barnave dhe Pajisjeve Mjekësore.