Me rastin e Ditës Botërore të Diabetit, Ministria e Shëndetësisë organizoi një tryezë të rrumbullakët me moton “Diabeti në të gjitha etapat e jetës”, për të nxjerrë në pah rëndësinë e parandalimit, diagnostikimit të hershëm dhe qasjes së barabartë në trajtim për pacientët me diabet.
Zv/Ministrja e Shëndetësisë, Dr. Dafina Gexha-Bunjaku, në fjalën e saj theksoi përkushtimin e institucioneve për forcimin e masave parandaluese, sigurimin e trajtimit cilësor dhe thellimin e bashkëpunimit institucional, përcjell Gazeta Shneta.
Ajo njoftoi gjithashtu se po finalizohet Plani i Veprimit për Sëmundjet Kronike Jo Ngjitëse 2026–2028, i cili synon reduktimin e faktorëve të rrezikut dhe përmirësimin e qasjes në shërbime shëndetësore.
Në kuadër të përkujdesjes për pacientët, Ministria e Shëndetësisë ofron terapi me insulinë për të gjithë pacientët insulinvarës në të gjitha nivelet e kujdesit shëndetësor, me një buxhet vjetor prej 3.595.147 euro. Aktualisht, 15,715 pacientë përfitojnë nga kjo terapi.
Tryeza u pasurua edhe nga pjesëmarrja e drejtuesve institucionalë, përfaqësuesve të Shoqatës së Diabetikëve dhe profesionistëve të tjerë shëndetësorë. /Gazeta Shneta/