Studiuesit në Mbretërinë e Bashkuar po shqyrtojnë përdorimin e krimbave të vegjël të ujërave të qeta, të njohur si planaria, si një alternativë etike ndaj minjve dhe lepujve laboratorikë në kërkimet mbi trurin.
Këta krimba të padëmshëm, që zakonisht lëvizin pa u vënë re në pellgje e lumenj, kanë treguar reagime të ngjashme me ato të gjitarëve kur u ekspozohen barnave psikiatrike.
Në një studim të ri, publikuar në revistën Pharmaceutical Research, planaria u trajtuan me haloperidol – një antipsikotik që përdoret për trajtimin e skizofrenisë dhe u bënë të ngadalshëm e joaktivë, njësoj si minjtë dhe lepujt laboratorikë, shkruan Euronews transmeton Gazeta Shneta.
“Kjo zbulim i shtohet provave në rritje se krimbat e vegjël si planaria mund të luajnë një rol të vlefshëm në mënyrën se si studiojmë trurin,” tha profesori Vitaliy Khutoryanskiy nga Universiteti i Reading, bashkautor i studimit.
Ai theksoi se përdorimi i këtyre krimbave përfshin “shumë më pak shqetësime etike” sesa testimi me minj e lepuj.
Vetëm gjatë vitit 2023, sipas universitetit, në Mbretërinë e Bashkuar janë përdorur 882 mijë minj dhe mbi 144 mijë lepuj në eksperimente shkencore.
Shkencëtarët besojnë se përdorimi i planarias mund të zvogëlojë ndjeshëm këto shifra, duke ofruar megjithatë të dhënat e nevojshme për zhvillimin e trajtimeve të reja për sëmundjet e shëndetit mendor.
Planaria janë përdorur edhe në studime të mëparshme për epilepsinë dhe varësinë ndaj drogës, pasi tregojnë shenja primitive të varësisë dhe simptomave të tërheqjes.
Zbulimi i fundit e forcon më tej argumentin për përdorimin e tyre në kërkime.
“Është një zhvillim i mirë për shkencën dhe për mirëqenien e kafshëve,” shtoi Khutoryanskiy./Gazeta Shneta/