Gjatë shtatzënisë, urina kontrollohet rregullisht në vizitat rutinë. Një nga arsyet pse analizohet urina është për të zbuluar proteinat. Edhe pse është normale të ketë një sasi të vogël proteine, një sasi e madhe e proteinës në urinë (proteinuria) gjatë shtatzënisë është shqetësuese.
Proteinuria gjatë shtatzënisë mund të jetë shenjë e preeklampsisë, një gjendje që shkakton tension të lartë të gjakut gjatë ose menjëherë pas shtatzënisë. Kjo mund të tregojë gjithashtu për një sëmundje të veshkave që ka nevojë për trajtim. Sasi të mëdha të proteinës në urinë mund të nënkuptojnë se veshkat nuk funksionojnë normalisht, shkruan burimi Very Well Health përcjell Gazeta Shneta.
Shkaqe të tjera të mundshme të proteinurisë gjatë shtatzënisë përfshijnë dehidratimin, inflamacionin, infeksionet, gurët në veshka, stresin, tensionin e ulët të gjakut apo ushtrime fizike intensive.
Për gratë që nuk janë shtatzënë, niveli mesatar i proteinës në urinë është më pak se 150 miligramë në ditë (mg/ditë). Për gratë shtatzëna, kufiri i sipërm është 300 mg/ditë. Shumica e profesionistëve të shëndetit e konsiderojnë serioze – një nivel mbi 500 mg/ditë, duke e parë si shenjë të preeklampsisë.
Simptomat e proteinës së lartë gjatë shtatzënisë
Simptomat e proteinës së lartë në urinë varen nga shkaku bazë. Një shkak i zakonshëm i proteinurisë gjatë shtatzënisë është preeklampsia, që zakonisht zhvillohet pas javës së 20-të të shtatzënisë.
Preeklampsia prek rreth 3% deri në 7% të shtatzënive në Shtetet e Bashkuara.
Simptomat e preeklampsisë përfshijnë:
– Tension i lartë i gjakut.
– Enjtje në duar dhe fytyrë.
– Shtim i papritur në peshë.
– Dhimbje koke të vazhdueshme.
– Dhimbje në anën e djathtë të barkut.
– Mosurinim.
– Nauze dhe të vjella.
– Ndryshime në shikim.
– Marramendje ose humbje e ndjenjave.
– Vështirësi në frymëmarrje.
Nëse nuk trajtohet, preeklampsia mund të çojë në komplikime kërcënuese për jetën, përfshirë kriza epileptike, goditje në tru dhe sindromën HELLP (hemolizë, rritje e enzimave të mëlçisë dhe ulje e trombociteve). Sindroma HELLP është urgjencë mjekësore dhe duhet trajtuar menjëherë.
Proteinuria gjatë shtatzënisë mund të shkaktohet edhe nga sëmundja e veshkave. Simptomat e sëmundjes së veshkave përfshijnë:
– Urinë me shkumë ose ngjyrë kafe.
– Dhimbje në pjesën e poshtme të shpinës.
– Enjtje në duar dhe këmbë.
– Shtim ose ulje e urinimit.
– Lëkurë që kruhet.
– Ngërçe muskulore.
– Nauze dhe të vjella.
– Lodhje.
– Rënie në peshë.
– Vështirësi në frymëmarrje.
– Mjegullim i mendjes. /Gazeta Shneta/