Monitorimi i rregullt i tensionit të gjakut në shtëpi mund të zvogëlojë ndjeshëm rrezikun për sulm në zemër, goditje në tru dhe sëmundje të tjera kardiovaskulare, sugjeron një studim i ri i publikuar në revistën “European Heart Journal – Digital Health”.
Sipas hulumtimit, personat me hipertension që matnin tensionin në shtëpi dhe ua përcillnin rezultatet mjekëve përmes një sistemi monitorimi në distancë kishin 34 për qind më pak gjasa të shtroheshin në spital ose të humbnin jetën nga sulmi në zemër, goditja në tru apo dështimi i zemrës.
Studimi përfshiu rreth 450 mijë pacientë me tension të lartë të gjakut në Skoci gjatë periudhës 2019–2022. Nga ta, rreth 9,500 persona përdorën një program të monitorimit në distancë të quajtur “Connect Me BP”.
Përmes këtij sistemi, pacientët merrnin mesazhe kujtuese për të matur tensionin në shtëpi, ndërsa rezultatet dërgoheshin automatikisht te mjekët e tyre. Mjekët më pas ndërhynin kur vërenin nevojë për ndryshime në trajtim ose kontrolle shtesë.
Rezultatet treguan se pjesëmarrësit në program arritën ulje të tensionit të gjakut brenda tre muajve të parë dhe kjo përmirësim u ruajt për më shumë se një vit.
Profesori Brian McKinstry nga Universiteti i Edinburgut, një nga autorët e studimit, tha se bëhet fjalë për provën më të fortë deri më tani se monitorimi në distancë jo vetëm që ndihmon në kontrollin e tensionit të gjakut, por ul edhe rrezikun e sulmeve në zemër dhe goditjeve në tru.
Edhe studiuesja Janet Hanley nga Universiteti Napier në Edinburg theksoi se sëmundjet kardiovaskulare mbeten ndër shkaqet kryesore të vdekshmërisë dhe paaftësisë, ndërsa çdo metodë që ndihmon në uljen e rrezikut ka rëndësi të madhe për shëndetin publik.
Ekspertët vlerësojnë se matja e tensionit në shtëpi është një mënyrë e thjeshtë, praktike dhe e përshtatshme për pacientët, ndërsa mund të ndihmojë në zbulimin e hershëm të problemeve dhe përmirësimin e kontrollit të hipertensionit.
Sipas tyre, qasjet inovative si monitorimi në distancë mund t’i ndihmojnë njerëzit të jetojnë më gjatë dhe me më pak komplikime nga sëmundjet e zemrës dhe enëve të gjakut.