Sëmundja kronike e veshkave (SKV) është një problem serioz shëndetësor që prek miliona njerëz në mbarë botën. Faktorë si tensioni i lartë i gjakut, diabeti dhe obeziteti rrisin ndjeshëm rrezikun për zhvillimin e kësaj sëmundjeje. Studime të shumta kanë treguar se ushqyerja e shëndetshme dhe aktiviteti fizik luajnë një rol kyç në uljen e këtij rreziku.
Së fundmi, një studim i ri ka zbuluar se dieta “EAT-Lancet”, e cila është kryesisht bimore dhe e qëndrueshme për mjedisin, mund të ndihmojë në parandalimin dhe uljen e rrezikut për zhvillimin e sëmundjes kronike të veshkave, shkruan burimi Medical News Today transmeton Gazeta Shneta.
SKV, e njohur edhe si humbje graduale e funksionit të veshkave, prek rreth 800 milionë të rritur në mbarë botën, një shifër që është më shumë se dyfishuar që nga viti 1990.
Studimi, i realizuar nga studiues në Kinë dhe i publikuar në “Canadian Medical Association Journal”, tregon se një dietë e orientuar drejt ushqimeve bimore lidhet me një rrezik më të ulët për zhvillimin e SKV-së.
Sipas ekspertëve, këto gjetje përforcojnë idenë se dietat me bazë bimore mbështesin shëndetin e veshkave, duke ofruar përfitime biologjike të matshme.
Një aspekt i rëndësishëm i studimit është se dieta kishte efekt mbrojtës edhe tek individët që jetojnë në mjedise më pak të favorshme për shëndetin, si zonat me mungesë hapësirash të gjelbra. Kjo sugjeron se ushqyerja e shëndetshme mund të kompensojë pjesërisht faktorët negativë mjedisorë.
Dieta “EAT-Lancet” përfshin kryesisht perime, fruta, drithëra të plota, bishtajore, arra dhe vajra të pangopur, si dhe sasi të ulëta deri mesatare të peshkut dhe mishit të shpendëve. Mes tjerash, kufizon ndjeshëm mishin e kuq, ushqimet e përpunuara, sheqerin e shtuar dhe drithërat e rafinuara, duke synuar njëkohësisht shëndetin e njeriut. /Gazeta Shneta/