Një vaksinë e personalizuar me ARNm, e zhvilluar nga kompanitë farmaceutike Moderna dhe Merck, po tregon rezultate shumë premtuese për pacientët me melanomë me rrezik të lartë, një nga format më agresive të kancerit të lëkurës.
Të dhënat nga një ndjekje pesëvjeçare në provat klinike sugjerojnë se kjo terapi ofron përfitime të qëndrueshme në luftën kundër tumorit dhe përmirëson mbijetesën e pacientëve, shkruan burimi Euronews Health transmeton Gazeta Shneta.
Terapia ndodhet aktualisht në fazën e dytë të provave klinike dhe kombinon teknologjinë e personalizuar ARNm të Moderna-s, të njohur si intismeran autogene, me imunoterapinë Keytruda të Merck-ut.
Rezultatet tregojnë se ky kombinim uli me 49% rrezikun e rikthimit të kancerit ose vdekjes tek pacientët me melanomë me rrezik të lartë, krahasuar me trajtimin vetëm me Keytruda, pas ndërhyrjes kirurgjikale.
Vaksina ARNm funksionon duke “trajnuar” qelizat imunitare të njohin shënuesit specifikë të kancerit, ndërsa Keytruda bllokon proteinat PD-1 që tumoret përdorin për t’u fshehur nga sistemi imunitar. Kjo i mundëson qelizave T, të cilat luajnë një rol qendror në përgjigjen imune, të sulmojnë tumorin në mënyrë më efektive.
Aktualisht, Moderna dhe Merck po presin rezultatet e fazës së tretë të provave klinike, faza përfundimtare e testimit, për të konfirmuar këto përfitime tek një numër më i madh pacientësh.
Kjo terapi synon melanomën me rrezik të lartë, e cila mund të përhapet edhe pas heqjes kirurgjikale.
Melanoma është forma më e rrezikshme e kancerit të lëkurës dhe rastet e saj janë në rritje globale. Në vitin 2022 u diagnostikuan mbi 330,000 raste të reja në mbarë botën, duke e bërë këtë vaksinë një shpresë të re në trajtimin e kancerit. /Gazeta Shneta/