Një studim i prezantuar në Kongresin e 41-të të Komitetit Evropian për Trajtimin dhe Kërkimin në Sklerozën Multiple (ECTRIMS 2025) tregon se menopauza mund të ketë rol vendimtar në mënyrën se si sëmundja manifestohet tek gratë, si dhe në problemet shëndetësore shoqëruese.
Nga analiza e mbi 860 pacientëve, u pa se simptomat fillestare ndryshojnë sipas statusit hormonal: tek gratë para menopauzës, shenjat shpesh fillonin nga nervi optik (21.8%), ndërsa tek ato pas menopauzës dhe tek burrat prekej më shpesh palca kurrizore (44% dhe 48.3%), shkruan MedicalXpress transmeton Gazeta Shneta.
Studimi nxori gjithashtu dallime të mëdha në sëmundjet shoqëruese. Vetëm 15% e grave para menopauzës kishin komorbiditete, krahasuar me 41% të grave pas menopauzës dhe 36.6% të burrave.
Tek gratë pas menopauzës dominonin sëmundjet kardiovaskulare dhe çrregullimet metabolike si diabeti dhe hipotiroidizmi, ndërsa tek gratë më të reja ishin më të shpeshta problemet psikike si depresioni dhe ankthi.
Gjatë periudhës së studimit u regjistruan vdekje vetëm tek burrat (15 raste) dhe gratë pas menopauzës (9 raste), ndërsa tek gratë para menopauzës nuk pati raste vdekshmërie.
Sipas autores kryesore, Yasemin Şimşek, këto të dhëna tregojnë se trajtim më i personalizuar i MS është i domosdoshëm: tek gratë para menopauzës duhen monitoruar rikthimet e shpeshta të sëmundjes, ndërsa tek burrat dhe gratë pas menopauzës nevojiten strategji për parandalimin e neurodegjenerimit dhe paaftësisë./Gazeta Shneta/