Një studim i ri ka zbuluar se gratë që hyjnë në periudhën e perimenopauzës përballen me rrezik më të lartë për probleme të zemrës krahasuar me ato që vazhdojnë të kenë cikël të rregullt menstrual. Sipas studiuesve, gratë në këtë fazë kanë dy herë më shumë gjasa të kenë tregues më të dobët të shëndetit kardiovaskular.
Perimenopauza është periudha para menopauzës kur hormonet fillojnë të ndryshojnë dhe cikli menstrual bëhet i çrregullt.
Studiuesit theksojnë se luhatjet e estrogjenit mund të ndikojnë negativisht në kolesterol, tensionin e gjakut, nivelin e sheqerit dhe shtimin në peshë, shkruan burimi Health Day transmeton Gazeta Shneta.
Studimi analizoi më shumë se 9,200 gra të moshave 18 deri në 80 vjeç për të vlerësuar shëndetin e tyre.
Analiza e studimit përfshiu ushqimin, aktivitetin fizik, gjumin, duhanin, si dhe treguesit kryesorë shëndetësorë si presioni i gjakut, kolesteroli dhe sheqeri në gjak.
Rezultatet treguan se shëndeti i zemrës përkeqësohej gradualisht me afrimin e menopauzës.
Gratë në perimenopauzë kishin nivele më të larta të kolesterolit dhe vështirësi më të mëdha në kontrollin e sheqerit në gjak. Sipas ekspertëve, kjo periudhë duhet parë si një mundësi për ndërhyrje të hershme dhe kujdes më të madh ndaj shëndetit.
Një nga problemet kryesore të evidentuara ishte ushqimi jo i shëndetshëm, i cili mori pikët më të ulëta në vlerësimet e stilit të jetesës.
Specialistët rekomandojnë aktivitet fizik të rregullt, kontroll të vazhdueshëm të tensionit, kolesterolit dhe sheqerit, si dhe ndjekjen e një diete të shëndetshme me më pak kripë.
Mjekët inkurajojnë gratë që të konsultohen me specialistët gjatë kësaj faze, pasi kujdesi i hershëm mund të ndihmojë në uljen e rrezikut për sëmundje të zemrës në të ardhmen. /Gazeta Shneta/