Studime të reja tregojnë se disa lloje ushtrimesh fizike mund të ndihmojnë ndjeshëm në uljen e tensionit të lartë të gjakut tek personat me hipertension.
Analiza më e fundit lidh ushtrimet aerobike, kombinimin e ushtrimeve aerobike me ato të forcës, si dhe stërvitjen me intervale me intensitet të lartë (HIIT), me përmirësime të dukshme të presionit të gjakut gjatë 24 orëve, shkruan burimi Medical News Today transmeton Gazeta Shneta.
Hipertensioni konsiderohet një nga faktorët kryesorë të rrezikut për sëmundjet kardiovaskulare, përfshirë goditjen në tru, sulmin në zemër dhe dështimin e zemrës.
Shumë njerëz jetojnë me tension të lartë pa qenë të vetëdijshëm për këtë problem. Për këtë arsye, aktiviteti fizik rekomandohet prej kohësh si pjesë e trajtimit dhe parandalimit.
Hulumtimi analizoi 31 studime klinike me mbi 1,345 pjesëmarrës dhe përfshiu forma të ndryshme ushtrimesh, si ecja e shpejtë, vrapimi, çiklizmi, ushtrimet me pesha, joga, pilates, sportet rekreative dhe HIIT.
Rezultatet treguan se ushtrimet aerobike mbeten metoda më e qëndrueshme për uljen e tensionit gjatë ditës dhe natës.
Megjithatë, kombinimi i ushtrimeve aerobike me ato të rezistencës dhe HIIT sollën gjithashtu rezultate shumë pozitive.
Sipas studiuesve, stërvitja e kombinuar ndihmon jo vetëm sistemin kardiovaskular, por edhe forcimin muskulor dhe funksionalitetin fizik.
Ndërkohë, HIIT po konsiderohet një alternativë praktike për njerëzit që kanë mungesë kohe, pasi jep rezultate të mira në periudha më të shkurtra ushtrimi.
Ekspertët theksojnë se ushtrimet aerobike dhe ato të kombinuara duhet të mbeten rekomandimet kryesore për kontrollin e tensionit të gjakut, ndërsa kërkime të tjera do të ndihmojnë për të kuptuar më mirë efektet e formave të tjera të aktivitetit fizik. /Gazeta Shneta/