Mungesa e njohjes dhe diagnostikimit të sindromës hipermobile të ‘Ehlers-Danlosit’ po shndërrohet në një problem serioz të shëndetit publik, paralajmërojnë pacientët dhe ekspertët. Sipas një studimi të fundit, personat me këtë çrregullim mund të presin deri në 21 vjet për të marrë një diagnozë të saktë, raporton The Guardian.
Një grua 34-vjeçare nga Mbretëria e Bashkuar rrëfen se si sëmundja ia ka ndryshuar jetën. Ajo tregon se problemet shëndetësore nisën që në moshën 19-vjeçare me ndërhyrje kirurgjikale të shumta, ndërsa më vonë u diagnostikua me kancer të tiroides dhe sëmundjen autoimune Hashimoto.
Për vite me radhë ajo ka jetuar me dhimbje kronike, lodhje të vazhdueshme dhe çrregullime neurologjike që e kanë penguar të lexojë, të shikojë televizor apo madje të flasë qartë.
Sindroma hipermobile e Ehlers-Danlosit është një çrregullim i indit lidhor që shkakton lëvizshmëri të tepruar të nyjeve, dhimbje kronike dhe një sërë komplikimesh të tjera. Megjithatë, shumë pacientë kalojnë vite të tëra pa diagnozë, ndërsa shpesh diagnostikohen gabimisht me probleme psikologjike.
Sipas të dhënave të cituara, mbi 94% e pacientëve përjetojnë të paktën një diagnozë të gabuar psikiatrike para se të zbulohet shkaku i vërtetë i simptomave.
Ekspertët vlerësojnë se rreth një në 227 persona në Mbretërinë e Bashkuar mund të preket nga kjo sindromë, por deri në 95% e rasteve mbeten të padiagnostikuara. Sëmundja shoqërohet shpesh edhe me gjendje të tjera si sindroma e takikardisë ortostatike posturale dhe sindroma e aktivizimit të mastociteve.
Studiuesit theksojnë se barra e paaftësisë që shkakton kjo sindromë është e krahasueshme me atë të sklerozës multiple, por financimi për studime mbetet shumë më i ulët. /Gazeta Shneta/