Më shumë se 1.2 milionë njerëz vdiqën në mbarë botën në vitin 2019 nga infeksionet e shkaktuara nga bakteret rezistente ndaj antibiotikëve, sipas studimit më të madh të çështjes deri më sot.
Ky është më shumë se numri vjetor i vdekjeve nga malaria ose SIDA, raporton BBC përcjell Gazeta Shneta.
Vendet më të varfra janë më të prekura, por rezistenca antimikrobike kërcënon shëndetin e të gjithëve, zbulon raporti.
Rekomandohet investimi urgjent në barna të reja dhe përdorimi më i mençur i atyre aktual për t’u mbrojtur kundër sëmundjeve.
Përdorimi i tepërt i antibiotikëve vitet e fundit për infeksionet e parëndësishme do të thotë se ata po bëhen më pak efektivë kundër infeksioneve serioze.
Njerëzit po vdesin nga infeksione të zakonshme, të trajtueshme më parë, sepse bakteret që i shkaktojnë ato janë bërë rezistente ndaj trajtimit.
Zyrtarët shëndetësorë në Mbretërinë e Bashkuar kohët e fundit paralajmëruan se rezistenca antimikrobike (AMR) ishte një “pandemi e fshehur” që mund të shfaqej pas Covid-19 nëse antibiotikët nuk përshkruheshin me përgjegjësi.
Shumica e vdekjeve nga rezistenca antimikrobike u shkaktuan nga infeksione të rrugëve të poshtme të frymëmarrjes, të tilla si pneumonia dhe infeksionet e qarkullimit të gjakut, të cilat mund të çojnë në sepsë.
MRSA (Staphylococcus aureus rezistent ndaj meticilinës) ishte veçanërisht vdekjeprurës, ndërsa E. coli dhe disa baktere të tjera ishin gjithashtu të lidhura me nivele të larta të rezistencës ndaj barnave. /Gazeta Shneta/