Këtë javë tek rubrika “Mjeku Javës” në Gazetën Shneta është Drita Lumi – Demiri, specialiste e mjekësisë familjare.
Drita Lumi – Demiri, e lindur më 3 Tetor 1962 në Bllacë, Suharekë, Kosovë, është një mjek familjar me përvojë dhe përkushtim në fushën e shëndetit publik. Pas përfundimit të shkollës së mesme në Suharekë në vitin 1981, ajo u diplomua nga Fakulteti i Mjekësisë në Prishtinë më 14 Janar 1989. Në vitin 2001, ajo fitoi diplomën e specializimit në Mjekësi Familjare, pas të cilës nisi punën si mentor klinik në programin e specializimit të Mjekësisë Familjare në Divizionin e Kujdesit Parësor Shëndetësor. Ajo ka qenë e angazhuar në hartimin e protokoleve klinike kombëtare dhe është koautore e disa udhërrëfyesve për standardizimin e trajtimit të pacientëve. Gjithashtu, ajo ka bashkëpunuar me organizata ndërkombëtare si UNFPA, UNICEF dhe OBSH për të përmirësuar shëndetin e nënës dhe fëmijës në Kosovë. Ajo ka një aftësi të lartë në gjuhët shqipe, kroate, anglisht dhe serbisht.
Një specialist i mjekësisë familjare është një mjek i specializuar në ofrimin e kujdesit shëndetësor të përgjithshëm. Kjo përfshin diagnostikimin dhe trajtimin e sëmundjeve të shpeshta, menaxhimin e kujdesit kronik, dhe ofrimin e këshillave për shëndetin dhe parandalimin e sëmundjeve. Specialisti i mjekësisë familjare promovon në kujdesin shëndetësor dhe është i përkushtuar në ndihmën e pacientëve për të mbajtur shëndetin dhe mirëqenien. Ai gjithashtu mund të koordinojë kujdesin për pacientët në rastet kur ata kanë nevojë për shërbime të specializuara nga mjekë të tjerë ose profesionistë shëndetësorë.
Intervista e plotë:
Cilat janë strategjitë dhe rekomandimet tuaja për menaxhimin e sëmundjeve kronike si diabeti dhe tensioni i lartë në mjedisin e një familjeje?
Gjatë trajtimit të sëmundjeve kronike si diabeti dhe tensioni i lartë, çdo mjek familjar duhet të bazohet në udhërrëfyesit klinik dhe protokolet kombëtare për këto dy sëmundje.
Si mund të përmirësohet komunikimi dhe bashkëpunimi midis mjekut të mjekësisë familjare dhe pacientit për të siguruar një kujdes më efektiv dhe të personalizuar?
Programi i specializimit në Mjekësi Familjare është një mjet i fuqishëm për të përmirësuar komunikimin midis mjekut dhe pacientit. Përmes një qasjeje empatike dhe komunikimit me pyetje të hapura, mund të sigurohet një kujdes efektiv. Megjithatë, kujdesi i personalizuar është gjithashtu thelbësor dhe duhet të përforcohet edhe më shumë.
Cilat janë shenjat dhe simptomat kyçe që duhet të vëzhgohen në familje për të identifikuar problemet shëndetësore në fazën e hershme dhe për t’u parandaluar ato?
Për çdo gjendje klinike, një mjek me kompetencë profesional është i thirrur të dallojë gjendjet e zakonshme dhe ato të jashtëzakonshme që mund të rrezikojnë jetën e pacientit. Mjeku bazohet në simptoma dhe ekzaminim klinik, por historia e sëmundjeve në familje është gjithashtu shumë e rëndësishme për disa gjendje të caktuara.
Si do të përshkruani rëndësinë e parandalimit dhe promovimit të shëndetit në mjedisin e familjes, duke përfshirë edukimin për dietën e shëndetshme, aktivitetin fizik, dhe menaxhimin e stresit?
Mendoj se parandalimi është një nga hallkat më të rëndësishme për shëndetin e mirë. Në përshkrimin e detyrave të mjekut familjar, parandalimi ka një vend të rëndësishëm. Parandalimi përfshin edukimin për dietën e shëndetshme, ushtrimet fizike dhe menaxhimin e stresit.
Cilat janë mënyrat më efektive për të përcjellë dhe për të edukuar familjet rreth planifikimit të shëndetit dhe marrjes së parashikimeve për të parandaluar sëmundjet dhe për të përmirësuar cilësinë e jetës së tyre?
Në çdo takim me pacientin, pavarësisht nga mosha, gjinia, statusi social dhe familjar, mjeku duhet të promovojë një stil të shëndetshëm të jetës si përfshirë ushqimin e shëndetshëm, ushtrimet fizike dhe menaxhimin e stresit.
/GazetaShneta/