Kur e kishin thirr për të filluar punën, motra Hamdije kishte menduar se po e gënjenin.
Jo për ndonjë arsye, por sepse ishte data 1 prill. Hamdije Zhubi në këtë ditë të vitit 1960, nisi punën si motër medicinale në pozitën për pranimin e pacientëve, shkruan Gazeta Shneta.
“Jam munduar të kontribuoj për pacientët”, thotë 80-vjeçarja.
Ajo tregon se si kishte rrezikuar vendin e saj të punës duke i futur pacientët të cilët nuk kishin libreza shëndetësie.
“Ka qenë koha kur nuk i pranonin pacientët pa librezë dhe iu kam thënë të marrin libreza të tjera dhe ka ndodh që i kam shkruar edhe me emër timin”, rrëfen motra Hamdije.
Koha më e vështirë si infermiere për të janë vitet e 80-ta, kur kishin filluar demonstratat e studentëve.
Ajo thotë se atë kohë kanë pranuar shumë të lënduar e plagosur nga policia serbe.
“Kur kanë qenë demonstratat ka qenë koha më e vështirë sepse kemi pas shumë studentë të lënduar”, shprehet Zhubi.
Infermierja më e vjetër në Kosovë është pensionuar në vitin 1986.
Asaj dhe 14 motrave të tjera medicinale pak më të reja se Zhubi, iu ndan sot mirënjohje për kontribut në shëndetësi nga Komuna e Prishtinës. /Gazeta Shneta/