Ministria e Shëndetësisë synon që për tre vjet ta përfundoj objektin e emergjencës së re në QKUK. Punimet në objekt pa inventar medicinal do t’i kushtojnë buxhetit të shtetit 16 milionë Euro.
Ministria e Shëndetësisë ka iniciuar një procedurë tenderuese për përfundimin e punimeve infrastrukturore në objektin e Klinikës Emergjente në Qendrën Klinike Universitare të Kosovës. Njoftimi paraprak është publikuar ndërsa tenderi do të hapet në prill të këtij viti, shkruan Gazeta Shneta.
Punimet pritet të zgjasin deri në dhjetor të vitit 2025 ndërsa do t’i kushtojnë buxhetit të shtetit 16 milionë Euro.
“Destinimi mbetet si Klinik Emergjente e QKUK-së. Jemi në proces te adaptimit të projektit paraprak me qëllim të evitimit të mangësive dhe plotësimeve të nevojshme teknike dhe funksionale sipas kërkesave të profesionistëve. Me këtë tender planifikohet që të kryhet infrastrukturë ndërtimore ( ndertimi i objektit)”, thuhet në përgjigjen e MSH-së.
Objekti sipas ministrisë do t’i ketë pesë salla operative me rreth 350 shtretër.
Projekti për këtë ndërtesë kishte filluar në vitin 2010 ndërsa punimet kishin nisur në vitin 2016 dhe më pas operatori ekonomik ishte tërhequr. Për punët e kryera në objektin ekzistues MSH i ka thënë Gazetës Shneta se ka paguar mbi 4.4 milionë Euro.
“Deri me tani në projekt janë paguar 4,446,882.21 euro për strukturën ekzistuese e dalë nga projekti i parë (2010)”.
Ndërkaq për këtë vit janë ndarë 4.4 milionë euro për punimet që do të kryhen. “Për Kliniken Emergjente në QKUK, buxheti është 16 milion euro, i paraparë që të realizohet për tri vjet, ndërsa në Ligjin e Buxhetit, janë paraparë 4.4 milion euro për këtë vit për këtë projekt”, thuhet në përgjigjen e MSH-së. /Gazeta Shneta/
MSH paralajmëron 6 tenderë në vlerë mbi 30 milionë Euro për ndërtimin e objekteve shëndetësore