Muaji tetor – muaj ndërkombëtar për luftimin e kancerit të gjirit i gjen tre spitale rajonale pa shërbim të mamografisë.
Mungesa e stafit pamundëson ofrimin e shërbimeve të mamografisë në Spitalin Rajonal në Ferizaj dhe në atë të Mitrovicës. Pacientet në këto dy komuna janë të detyruar të kërkojnë shërbim për mamografi në Qendrën Klinike Universitare të Kosovës apo në ndonjë spital privat.
Në shtator të vitit të kaluar, në Spitalin Rajonal të Ferizajt, për herë të parë ishte funksionalizuar aneksi i Radiologjisë dhe aparati i CT-së- në të cilën përfshihen edhe shërbimet e mamografisë, por gratë në këtë qytet nuk ia panë hajrin kësaj aparature për shkak se një shërbim i tillë asnjëherë nuk është funksionalizuar ndërsa aparatura vetëm “zë vend” në këtë hapësirë.
“Aparaturën për mamografi e kemi tash e më tepër se nje vit, por nuk kemi staf për me funksionalizu. Jo, nuk është funksionalizu asnjëherë që nga koha kur është funksionalizuar radiologjia në spital”, konfirmon UD. drejtori i Spitalit Rajonal në Ferizaj për Gazetën Shneta.
Ai thotë se janë në finalizim të konkursit për radiolog të rinj.
Të njejtin fat tash e disa javë e kanë edhe qytetaret në Komunë të Mitrovicës. Sipas drejtoreshës së spitalit, Luljeta Zhubi, në Radiologji ofrohen shërbimet e mamografisë vetëm në rastet sporadike ndërsa ajo thotë se me kërkesë të stafit aktual javëve në vazhdim do të fillojnë trajnimet dy javore.
“Mamografia nuk është në funksion me kapacitet të duhur edhe për shkak të stafit të pamjaftueshëm, por edhe stafi ka kërkuar trajnim freskues dy javorë”, bënë të ditur drejtoresha ndërsa sqaron se trajnimi do të bëhet në QKUK dhe pastaj pritet të funksionalizohet më mirë shërbimi i mamografisë.
Ndyshe nga dy spitalet paraprake, në atë të Vushtrrisë qëndron një problem tjetër. Për shkak të një defekti të cilin tash e tetë muaj Shërbimi Spitalor Klinik Universitar nuk ka arritur ta rregulloj në aparaturën e mamografisë pacientet në këtë rrethin nuk mund të marrin shërbimin e mamografisë – përmes së cilës identifikohen sëmundjet e gjirit tek gratë.
“Që nga muaji mars për shkak të problemit teknik Mamografia nuk ka punuar. Ekipi teknik është duke punuar intensivisht në riparimin e defekteve teknike të Mamografit dhe presim për çdo moment të lëshohet”- bënë të ditur shefi i personelit në Spitalin Rajonal në Vushtrri, Abdullah Klinaku.
“Prej kur ka pësuar defekt mamografia, shërbimet nuk janë kryer në Spitalin tone, por, që radiologët e Spitalit, nëse ka pasur indicie, kanë realizuar ultrazë të gjirit, duke identifikuar rastet dhe në rast nevoje i kanë udhëzuar për trajtim të mëtutjeshëm diagnostik dhe specialistik”, sqaron po ashtu Klinaku për Gazetën Shneta.
Ai thotë se gjatë muajit tetor janë kryer 20 ultrazë të gjirit.
Në Spitalin Regjional të Vushtrrisë aktualisht janë gjashtë radiolog.
Mamografia në këtë spital ka qenë donacion nga Emiratet e Bashkuara gjatë vitit 2016.
Ndonëse tre spitale nuk mund të ofrojnë shërbime të mamografisë, UD drejtoresha e ShSKUK-së, Pranvera Zejnullahu – Raçi, është shprehur se shërbimet e mamografisë dhe ultrazërit të gjirit do të ofrohen në QKUK dhe në shtatë spitalet rajonale në vend.
“Jo vetëm në tetor, por gjatë tërë vitit mund të bëhet mamografia dhe ultrazëri i gjirit. Përveç në QKUK këtë shërbim mund ta merrni edhe më të gjitha spitalet rajonale”, ka shkruar ajo në facebook.
Zejnullahu – Raçi së bashku me menaxhmentin e Klinikës së Onkologjisë dje kanë pritur në takim Komisionin Parlamentar për Shëndetësi dhe Mirëqenje Sociale.
Klinika e Onkologjisë është e vetmja klinik në Kosovë për trajtimin e kancerëve. Në këtë klinik ka mungesë të theksuar të barnave. /Gazeta Shneta/