Heqja e fluorit nga furnizimi me ujë në SHBA mund të rezultojë në më shumë se 25 milionë dhëmbë të prishur tek fëmijët dhe adoleshentët brenda pesë viteve, paralajmëron një studim i ri.
Kjo është ekuivalenti i një dhëmbi të prishur për 1 nga çdo 3 fëmijë në Amerikë, sipas studiuesve nga Mass General Brigham.
“Fluori zëvendëson jonet më të dobëta brenda smaltit të dhëmbëve, duke e bërë atë më të fortë dhe më pak të ndjeshëm ndaj prishjes së dhëmbëve të shkaktuar nga bakteret”, tha studiuesja Dr. Lisa Simon.
“Studimi ynë ofron një pasqyrë të asaj që do të ndodhte në Shtetet e Bashkuara nëse do të ndërpritej fluorizimi i ujit”, shtoi Simon.
Sekretari i Shëndetësisë dhe Shërbimeve Njerëzore i SHBA-së, Robert F. Kennedy Jr., tha në prill se synon të ndalojë rekomandimet federale që fluori të shtohet në furnizimet publike me ujë të pijshëm.
Ligjvënësit në dy shtete, Utah dhe Florida, ndaluan fluorizimin e ujit të pijshëm në fillim të këtij viti, transmeton Gazeta Shneta.
Kennedy e quajti fluorin “mbetje industriale” gjatë fushatës së tij vjeshtën e kaluar dhe pretendoi se ai mund të shkaktojë një gamë të gjerë problemesh shëndetësore, përfshirë kancerin, sipas CNN. Kundërshtarët e fluorit janë gjithashtu të shqetësuar për efektet e mineralit në zhvillimin e trurit të fëmijëve.
Por Qendrat Amerikane për Kontrollin dhe Parandalimin e Sëmundjeve (CDC) e kanë cilësuar fluorizimin e ujit në komunitet si një nga 10 arritjet më të mëdha të shëndetit publik të shekullit të 20-të.
CDC gjithashtu vëren se fluorizimi “rekomandohet nga pothuajse të gjitha organizatat e shëndetit publik, mjekësore dhe dentare, duke përfshirë Shoqatën Amerikane të Stomatologjisë, Akademinë Amerikane të Pediatrisë, Shërbimin Publik të Shëndetit në SHBA dhe Organizatën Botërore të Shëndetësisë”.
Të paktën një furnizues i madh komunal i ujit – Calgary, në Alberta, Kanada – është tërhequr pas një ndalimi të fluorit, thanë studiuesit. Calgary hoqi fluorin nga uji i pijshëm në vitin 2011, vetëm për ta rifutur mineralin këtë mars në përgjigje të një rritjeje të kariesit të fëmijëve.
Për studimin e ri, studiuesit analizuan të dhëna të hollësishme mbi shëndetin oral dhe fluorizimin e ujit për gati 8,500 fëmijë që morën pjesë në një anketë shëndetësore mbarëkombëtare të financuar nga qeveria federale nga viti 2013 deri në vitin 2016.
Bazuar në këto të dhëna, studiuesit zhvilluan një model simulimi për të parë se si ndalimi i fluorit nga uji i pijshëm do të ndikonte në shëndetin oral të fëmijëve amerikanë.
Eliminimi i fluorit rriti numrin e përgjithshëm të dhëmbëve të prishur me 7.5 pikë përqindjeje, e barabartë me më shumë se 25 milionë dhëmbë më shumë me prishje brenda pesë viteve nga një ndalim i tillë, raportuan studiuesit.
Kujdesi shtesë dentar do të kushtonte 9.8 miliardë dollarë gjatë pesë viteve dhe do të rritej në 19.4 miliardë dollarë pas 10 vitesh, vunë në dukje studiuesit.
“Pjesa më e madhe e kostos së rritur mund t’i atribuohet fëmijëve të siguruar publikisht, që do të thotë se do të ishte një kosto e drejtpërdrejtë e shëndetit publik”, tha Simon.
Ekipi i hulumtimit vuri në dukje se një ndalim i fluorit do të ulte me 200,000 raste të fluorozës, një zbardhje të smaltit të dhëmbëve që mund të ndodhë me konsum të tepërt të fluorit.
Studimi nuk shqyrtoi efektet e mundshme njohëse të një ndalimi të fluorit, duke vënë në dukje se CDC, Agjencia Amerikane për Mbrojtjen e Mjedisit dhe Programi Kombëtar i Toksikologjisë tregojnë të gjitha se fluori është i sigurt për trurin e fëmijëve kur ofrohet në nivelet e rekomanduara të sigurta.
Të dhënat e anketës së përdorura në studim zbuluan se 1.5% e fëmijëve në SHBA janë të ekspozuar ndaj niveleve të tepërta të fluorit, ndërsa 40% janë të ekspozuar ndaj niveleve të rekomanduara dhe 46% ndaj niveleve më pak se optimale.
“Ne e dimë që fluori funksionon», tha Simon. «Jemi në gjendje të tregojmë se sa shumë funksionon për shumicën e komuniteteve dhe sa shumë humbasin njerëzit nëse e heqim qafe atë”.
Kreu i Shoqatës Amerikane të Stomatologjisë tha se nuk ka një zëvendësim të mirë.
“Nuk ka zëvendësim më të mirë për përdorimin e fluorit, të provuar nga koha dhe të besuar nga mjekët, në programet e ujit të komunitetit”, tha Dr. Brett Kessler në një deklaratë, sipas CNN.
“Asnjë sasi retorike politike apo dezinformimi nuk do ta ndryshojë idenë se shëndeti i mirë oral varet nga ushqyerja e duhur, higjiena orale dhe uji i fluorizuar në mënyrë optimale, ose suplementet e fluorit nëse programet e ujit të komunitetit nuk kanë fluor”, shtoi Kessler./Gazeta Shneta/