Thuhet se truri i fëmijëve është një sfungjer që thith çfarëdolloj informacioni që i vjen nga bota e jashtme. Zhvillimi i tyre është me hapa galoponte në vitet e para të jetës dhe prindi duhet të jetë një promotor i zhvillimit intelektual, emocional, psikomotor e shoqëror të fëmijës. Komunikimi me ta është shumë i rëndësishëm, interaktiviteti i fëmijëve me fëmijët e tjerë, lodrat që vënë në punë aftësinë e tyre të të menduarit, janë të gjitha në dorë të prindit.
Një nga ushtrimet psikomotore më efikase që këshillohet për fëmijët, është larja e duarve me sapun dhe jo me solucione, kjo sipas pediatres Lira Gjika. Ky veprim kaq i thjeshtë në dukje është një ushtrim për fëmijët. Zhdërvjelltësimi i duarve nxit sistemin nervor qendror dhe atë periferik. Dora është organi, që zë sipërfaqen më të madhe në hartën e hypokampusit (në tru). Gjithashtu zhdërvjelltësimi i dorës është i lidhur direkt me të folurin.
Lira Gjika shkon deri në gjenezën e njerëzit tek përmend faktin se zhvillimi historik i qenie njerëzore e ka zanafillën pikërisht në zhdërvjelltësimin e dorës. Sa më shumë njeriu e përdorte dorën, aq më shumë mendonte dhe përqendrohej për të gjetur zgjidhje dhe për t’i komunikuar. Larja e duarve me sapun është një ushtrim i përkryer psikomotor. Rrotullimi i sapunit nëpër duar për të krijuar shkumëzimin, e nxit fëmijën të përqëndrohet në kombinimin e lëvizjeve, për të mos I rrëshqitur sapuni nga dora. Po ashtu, si larja e duarve me sapun edhe krehja e flokëve dhe larja e dhëmbëve, kanë të njëjtin efekt, janë ushtrime psikomotore shumë efikase. Prindër! Nxitini fëmijët ti kryejnë këto veprime, sa të rëndësishme për higjienën vetjake, po aq të rëndësishme për zhvillimin psikomotor.