Sëmundja e Parkinsonit është çrregullimi neurologjik më i zakonshëm pas Alzheimerit dhe nuk ka një kurë të njohur.
Shkencëtarët në Mbretërinë e Bashkuar kanë zhvilluar një teknikë të re që mund të identifikojë shpejt dhe me saktësi sëmundjen e Parkinsonit në fazat e saj të hershme, shkruan Medical News Today përcjell Gazeta Shneta.
Testi i tyre joinvaziv merr vetëm tre minuta për të ekzaminuar sebumin për biomarkues të caktuar.
Sëmundja e Parkinsonit, është një çrregullim kronik dhe progresiv i lëvizjes që prek pothuajse një milion njerëz në Shtetet e Bashkuara. Rreth 60,000 amerikanë marrin një diagnozë të Parkinsonit çdo vit.
Kjo gjendje zhvillohet kur truri nuk prodhon mjaftueshëm dopaminë, i cili gjithashtu ndihmon në kontrollin e lëvizjeve dhe koordinimit.
Studiuesit në Universitetin e Mançesterit në Mbretërinë e Bashkuar thonë se kanë gjetur një mënyrë për të kontrolluar sekrecionet e lëkurës për sëmundjen e Parkinsonit.
Procesi i tyre i thjeshtë tre-minutësh përdor shtupa pambuku dhe spektrometrinë e masës për të zbuluar qindra lipide unike të lidhura me sëmundjen.
Ata besojnë se “identifikimi i biomarkerëve të fuqishëm për të plotësuar diagnozën klinike do të përshpejtojë opsionet e trajtimit”.
Detajet e këtij zbulimi shfaqen në Journal of the American Chemical Society.
Rritja e prodhimit të sebumit, një substancë vajore e pranishme në mënyrë natyrale në të gjithë lëkurën e njeriut, është një simptomë treguese e sëmundjes së Parkinsonit, e dokumentuar për herë të parë në vitin 1927.
Analizat biofluide kanë zbuluar se fillimi i sëmundjes së Parkinsonit mund të shkaktojë ndryshime në përbërjen e tij.
Studimi aktual u frymëzua nga Joy Milne, një grua skoceze dhe infermiere në pension me hiperosmia trashëgimore – ndjeshmëri e pazakontë dhe e shtuar ndaj aromave.
Hulumtimet e mëparshme, raportuan se infermierja Milne vuri re një ditë se aroma karakteristike e burrit të saj kishte ndryshuar përpara se ai të shfaqte ndonjë simptomë klinike të Parkinsonit.
Burri i Milne, u diagnostikua përfundimisht me sëmundjen më shumë se një dekadë pasi ajo zbuloi për herë të parë aromën e lëkurës së ndryshuar.
Pas diagnozës zyrtare, çifti takoi të tjerë në një grup mbështetës të Parkinsonit në Mbretërinë e Bashkuar dhe infermierja Milne menjëherë vuri re se ata kishin të njëjtën erë të veçantë. Deri atëherë ajo e lidhi erën me sëmundjen e Parkinsonit.
Milne kishte bashkëpunuar me shkencëtarët për të studiuar më tej aftësitë e saj “super nuhatëse” dhe se si kjo mund të ndihmojë në përmirësimin e diagnozës dhe trajtimit të sëmundjes.
Prof. Perdita Barran, e cila udhëhoqi studimin aktual në Universitetin e Mançesterit, i tha burimit BBC-së se potenciali i një testi diagnostik për sëmundjen e Parkinsonit do të ishte “transformues” pasi aktualisht nuk ka asnjë test kimik të disponueshëm.
Në intervistën me BBC, prof. Barran tha se studiuesit po kërkojnë të bashkëpunojnë me laboratorët spitalorë lokalë dhe të zbatojnë testin brenda zonës së Mançesterit në dy vitet e ardhshme. /Gazeta Shneta/