Tuberkulozi, një nga infeksionet më vdekjeprurëse në botë, ka shënuar rënie globale për herë të parë që prej periudhës së pandemisë.
Sipas një raporti i mbështetur në të dhënat e reja të Organizatës Botërore të Shëndetësisë (OBSh), rastet e diagnostikuara të tuberkulozit kanë rënë me rreth 2% nga viti 2023 në 2024, ndërsa vdekshmëria ka pësuar një ulje prej 3%, shkruan Returs, transmeton Gazeta Shneta.
Ekspertët e OBSh-së e përshëndesin këtë si një sinjal pozitiv që tregon se sistemet shëndetësore po rikuperohen dhe shërbimet e diagnostikimit e trajtimit po përmirësohen.
Megjithatë, ata paralajmërojnë se përparimi është ende shumë larg objektivave globale për vitin 2030.
Raporti thekson se në vitin 2024, 1.23 milionë njerëz humbën jetën nga tuberkulozi një shifër ende alarmante, pavarësisht uljes krahasuar me vitet e mëparshme. OBSh-ja thekson se tuberkulozi mbetet sëmundja infektive me numrin më të madh të vdekjeve pas COVID-19.
Një tjetër problem madhor mbetet financimi: vetëm 5.9 miliardë dollarë u siguruan për luftën kundër tuberkulozit në vitin 2024, shumë larg objektivit prej 22 miliardë dollarësh të parashikuar për vitin 2027. Pa rritje të investimeve, rrezikohet të prapësohen arritjet e bëra. /Gazeta Shneta/