Organizata Botërore e Shëndetësisë ka bërë të ditur se numri i rasteve me hantavirus të lidhura me shpërthimin në anijen turistike “MV Hondius” ka arritur në 11, prej tyre nëntë të konfirmuara, ndërsa tre persona kanë humbur jetën.
Sipas të dhënave të publikuara më 12 maj, të gjitha rastet lidhen me pasagjerët ose ekuipazhin e anijes turistike, shkruan Euronews Health transmeton Gazeta Shneta.
Një grua franceze e infektuar me virusin ndodhet në gjendje kritike në një spital në Paris. Mjekët kanë bërë të ditur se ajo po trajtohet me aparat të frymëmarrjes artificiale për shkak të komplikimeve serioze në mushkëri dhe zemër.
OBSH ka njoftuar se mund të paraqiten edhe raste të tjera, për shkak të periudhës së gjatë të inkubacionit të virusit dhe kontaktit të ngushtë në anije, por ka theksuar se aktualisht nuk ka shenja të një shpërthimi më të gjerë.
Autoritetet shëndetësore kanë rekomanduar që të gjithë pasagjerët dhe anëtarët e ekuipazhit të qëndrojnë në karantinë për 42 ditë në vendet e tyre.
Ndërkohë, edhe një pasagjer spanjoll ka rezultuar pozitiv me hantavirus dhe po trajtohet në Madrid. Sipas autoriteteve spanjolle, pacienti ka simptoma të lehta respiratore dhe temperaturë të ulët.
Sipas OBSH-së, hantavirusi transmetohet kryesisht përmes kontaktit me urinën, feçet ose pështymën e brejtësve të infektuar. Transmetimi nga njeriu te njeriu konsiderohet i rrallë dhe është dokumentuar kryesisht në raste të kontakteve të ngushta familjare.
Periudha e inkubacionit të virusit mund të zgjasë nga katër deri në 42 ditë.