Gratë që janë të prekura nga sëmundja e sheqerit dhe planifikojnë të mbeten shtatzënë, duhet të jenë në konsulta të vazhdueshme me gjinekologun dhe endokrinologun.
Mamia Razije Musa thotë se edhe nënat që e fitojnë diabetin gestacional në shtatzëni, duhet të kenë kujdes të shtuar me ushqimet që i konsumojnë, transmeton Gazeta Shneta.
Lexoni këshillën e plotë të mamisë Razije Musa
Të dashura nana, dua të ndaj me ju disa informata të rëndësishme. Së fundmi isha pjesë e një trajnimi për profesionistët e fushës së gjinekologjisë në të cilin u fol për diabetin në shtatzëni.
Aty mendova se është e nevojshme të jap disa porosi për nanat që kanë diabet para se të mbeten shtatëzënë dhe ato që e fitojnë diabetin e shtatëzanisë.
Një grua mund t’a nis shtatëzaninë me diabet për të cilin ajo paraprakisht duhet te jetë trajtuar dhe të vazhdoj të jetë në kontakt të vazhdueshëm me mjekun endokrinolog.
Kur diabeti lajmërohet gjatë shtatzënisë e quajmë diabet gestational. Kjo ndodhë pasi që disa hormone të placentës e bllokojnë veprimin e insulinës te nana dhe për këtë ndodhë rritja e nivelit të glukozës në gjakun e gruas shtatëzanë.
Gruaja varësisht se a e ka filluar shtatëzaninë me diabet apo e ka fituar atë gjatë shtatëzanisë duhet ’i shmanget ushqimit i cili përmban sheqerna, pra më pak ëmbëlsira, mjaltë, e sheqer në përgjithësi të çfarëdo lloji qoftë ai.
Në vend të tyre dieta duhet të jetë sa më e pasur me ushqime të shëndetshme dhe me konsumim të ujit, së paku një deri në dy litra ujë gjatë ditës duhet të pihen. Bashkë me ushqimin pjesë e mbajtjes së nivelit normal të sheqerit në gjak duhet të jetë edhe aktiviteti fizik, pra kur nuk ka indikacione tjera që ndalojnë lëvizjen e shtatëzanës ecja apo noti duhet të jenë pjesë e përditshmërisë.
Është shumë me rëndësi që ju të bashkëpunoni me mjekun gjinekolog dhe endokrinolog në mënyrë që shtatëzania dhe lindja të shkojnë mbarë.
Me dashuri, Razija