Një studim i ri ka zbuluar se përdorimi i shpeshtë i antibiotikëve tek fëmijët nën moshën 2-vjeç mund të shoqërohet me pasoja afatgjata shëndetësore. Rezultatet tregojnë një lidhje të fortë mes ekspozimit të hershëm ndaj antibiotikëve dhe rritjes së rrezikut për astmë, alergji ndaj ushqimeve dhe alergji sezonale.
Sipas studiuesve, ky efekt lidhet me ndryshimet që antibiotikët shkaktojnë në mikrobiomën e zorrëve – ekosistemin kompleks të baktereve të dobishme që luajnë rol të rëndësishëm në zhvillimin e sistemit imunitar, shkruan burimi Health Day transmeton Gazeta Shneta.
Ekipi analizoi të dhënat e mbi 1 milion fëmijëve, duke i krahasuar sipas historikut të përdorimit të antibiotikëve dhe pranisë së më shumë se një duzine gjendjesh shëndetësore.
Rezultatet treguan se fëmijët e ekspozuar ndaj antibiotikëve para moshës 2-vjeç kishin 24% më shumë gjasa të zhvillonin astmë dhe 33% më shumë gjasa të kishin alergji ushqimore gjatë fëmijërisë.
Megjithatë, studimi nuk gjeti lidhje të rëndësishme mes përdorimit të antibiotikëve dhe çrregullimeve të tjera, si sëmundja celiake, sëmundjet inflamatore të zorrëve, ADHD apo çrregullimet e spektrit autik.
“Antibiotikët janë të domosdoshëm për trajtimin e infeksioneve bakteriale,” theksoi autori kryesor i studimit. “Por mjekët duhet të jenë të kujdesshëm kur i përshkruajnë tek fëmijët shumë të vegjël, pasi përdorimi i shpeshtë mund të ndikojë negativisht në shëndetin e tyre afatgjatë.”
Studimi është publikuar në “Journal of Infectious Diseases”, dhe hap diskutime të reja mbi mënyrat më të sigurta për përdorimin e antibiotikëve tek fëmijët. /Gazeta Shneta/