Një studim i ri ka zbuluar se përdorimi i tepruar i rrjeteve sociale nga fëmijët 11-12 vjeç në Shtetet e Bashkuara lidhet me eksperimentimin e hershëm me substanca si alkooli, nikotina dhe kanabisi.
Studimi, i publikuar në Drug and Alcohol Dependence, tregoi se adoleshentët që kalojnë më shumë kohë duke përdorur rrjetet sociale, duke dërguar mesazhe ose duke bërë video thirrje, janë më të prirur të eksperimentojnë me këto substanca një vit më vonë. Ndryshe nga kjo, koha e kaluar në aktivitete të tjera në ekran, si lojërat elektronike, shfletimi në internet ose shikimi i filmave, nuk u lidh me të njëjtat rreziqe, shkruan Medical X, transmeton Gazeta Shneta.
“Rezultatet tona sugjerojnë që lidhjet sociale online mund të nxisin marrëdhënien mes kohës në ekran dhe përdorimit të substancave te adoleshentët e hershëm,” shpjegon Dr. Jason M. Nagata, profesor pediatrie në Universitetin e Kalifornisë, San Francisko. “Kur fëmijët shohin vazhdimisht miq ose influencues duke konsumuar alkool apo cigare në rrjetet sociale, këto sjellje mund t’u duken normale, duke rritur gjasat për t’i provuar vetë.”
Platformat e rrjeteve sociale shpesh e paraqesin përdorimin e substancave në mënyrë pozitive dhe përdoren nga kompanitë për të reklamuar produkte si alkooli, duhani dhe kanabisi. “Me trurin ende në zhvillim dhe impulsivitet të lartë, adoleshentët e rinj janë veçanërisht të ndjeshëm ndaj këtij lloj përmbajtjeje dhe marketingu,” shton Nagata.
Ekspertët theksojnë se shkollat dhe prindërit mund të luajnë një rol kyç në përballimin e këtij problemi. “Shkollat mund të ofrojnë programe të edukimit mediatik, të cilat i mësojnë nxënësve ndikimin e përmbajtjes dixhitale në sjelljet e dëmshme,” sugjeron Kyle T. Ganson, profesor asistent në Universitetin e Torontos. “Prindërit mund të ndihmojnë duke monitoruar përmbajtjen që fëmijët ndjekin dhe duke vendosur udhëzime të qarta për përdorimin e ekraneve.”
Studimi, i cili përdori të dhënat nga studimi kombëtar Adolescent Brain Cognitive Development (ABCD), analizoi sjelljet e 8,006 adoleshentëve të hershëm të moshës 11-12 vjeç. Të dhënat treguan lidhjen mes zakoneve të përdorimit të ekraneve dhe eksperimentimit me substanca.
Ky hulumtim vë në pah rëndësinë e kuptimit të ndikimit që ndërveprimet sociale dixhitale kanë te sjellja e adoleshentëve. /Gazeta Shneta/