Në Ferizaj, personat me nevoja të veçanta po kërkojnë më shumë përkrahje nga autoritetet komunale për angazhimin e tyre në jetën institucionale e shoqërore. Madje, ata, kanë propozuar edhe një plan veprimi.
Enver Kosumi, i cili është person me nevoja të veçanta, si përfaqësues i shoqatës “Hendikos” ka theksuar se po mundohen që të realizojnë një plan të veprimit me institucionet komunale që t’u mundësohet lehtësimi dhe angazhimi i tyre në jetën shoqërore.
“Plani është i formuar specifikisht për nevojat e personave me aftësi të kufizuar, duke filluar për ofrimin e shërbimeve sociale, ofrimin e shërbimeve shëndetësore, qasje punësimi dhe aktivitetet kreative sportive dhe rekreative”, ka thënë Kosumi.
Edhe familjarët e personave me nevoja të veçanta kërkojnë më shumë përkrahje dhe mbështetje për këtë kategori.
“Ne jemi shumë larg vendeve të Evropës. Personat me nevoja të veçanta janë një prej kategorive më të margjinalizuara në Kosovë. Kështu që ata kanë nevojë për mbështetje. Fatkeqësisht tash ne e kemi komisionin qeveritar i cili është duke e bërë një vlerësim dhe kemi 20% ulje. Siç dihet ata që kanë qenë në kategorinë e parë po bien në kategorinë e dytë e kështu me radhë. Kemi një kategori të familjeve që janë në gjendje jashtëzakonisht të rëndë, kështu që ne kemi nevojë për përkrahje institucionale, kemi nevojë për avancim të kësaj kategorie dhe shpresoj që shoqëria duhet në të ardhmen ta ketë parasysh këtë”, ka thënë Nexhat Hasani, prind i fëmijës me nevoja të veçanta.
Në Drejtorinë e Shëndetësisë në Ferizaj thanë se përkrahja asnjëherë nuk do të mungojë por që duhet aprovimi i disa ligjeve.
“Realisht nëse miratohen dy ligjet që për momentin i takojnë Ministrisë së Drejtësisë dhe caktohen ato grande, atëherë përmes tyre neve si komunë na lehtësohet miratimi”, ka thënë Kemajl Emini, drejtor i Shëndetësisë dhe Mirëqenies Sociale në Ferizaj.
Plani i veprimit për shërbime sociale është hartuar për vitet 2023-2025./RTK/