Përparim Klinaku ka akuzuar ekipën e Neonatologjisë që për rreth dy orë vajza e tij, pesë ditëshe, ka qëndruar në inkubator pa nxemje. Sipas tij një gjë e tillë ka ndodhur për shkak të neglizhencës së stafit përgjegjës.
Klinaku përmes një postimi në facebook është shprehur i shqetësuar për faktin që foshnja e tij ka qëndruar në inkubator pa nxemje.
“Deri kur duhet me pritë që punëtorët që paguhen nga taksat tona t’i dalin zot punës se tyre?! Apo duhet të ndodhë tragjedia që të vetëdijësoheni?! Kjo foshnje që shihni në këtë fotografi është vajza ime(5 ditëshe), e cila, sot në QKUK-repartin e neonatologjisë, gati dy orë ka qëndruar në këtë inkubator pa nxemje, për shkak të neglizhencës së stafit përgjegjës!!! BOLL BRE MA SE NA KENI LODHË, DIELLIN DY GISHT MI KRY NA E KENI PRU!!!”, është shprehur i shqetësuar ai.
Në anën tjetër, një gjë të tillë e ka mohuar drejtoresha e Klinikës së Neonatologjisë, Hajrie Ismaili. Ajo thotë se në listat kontrolluese të pajisje nuk kanë evidentuar ndonjë pajisje e cila është jashtë funksionit.
“Në raportimet ditore në mbledhjet e kolegjiumit profesional dhe në listat kontrolluese të paisjeve nuk ka pasur evidence të mos funksionimit të inkubatorëve. Nuk jemi në dijeni për këtë ngjarje” – është shprehur ajo për Gazetën Shneta.
Drejtoresha thotë se ka kërkuar nga i gjithë personeli për të shmangur çdo paqartësi dhe keqkuptim, ajo sqaroi se shumë shpejt të bëhët deklaratë me shkrim për këtë situatë.
“Tani më është përcjell linku nga zyra e mediave pranë SHSKUK-së. Aktualisht në klinik disponojmë me paisje funksionale në mënyrë optimale dhe në rast eventual të mosfunksionimit të ndonjë paisje, me tu evidentuar bëhet menjëherë zëvendësimi i tyre”, është shprehur ajo. /Gazeta Shneta/