Komuna e Prizrenit ka lënë prapa edhe nivelin terciar në shërbimet shëndetësore sa i përket ofrimit të kujdesit paliativ.
Derisa ky shërbim nuk ekziston ende në Qendrën Klinike Universitare dhe as në spitalet e përgjithshme, Komuna e Prizrenit ka nisur me kujdesin shëndetësor për pacientët që janë në fazën terminale të sëmundjes, shkruan Gazeta Shneta.
Komuna ka njoftuar se personat që vuajnë nga sëmundjet kronike dhe janë në fazën terminale do të kenë mundësi t’i kryejnë kontrollet mjekësore nga shtëpitë e tyre.
“Ekipet mobile të kujdesit paliativ, të përbërë nga një mjek dhe dy infermierë, kanë filluar t’i kryejnë vizitat e rregullta tek shtëpitë e pacientëve për ofrimin e kontrolleve mjekësore dhe dhënien e terapisë apo këshillave mjekësore”.
Në kuadër të këtij projekti, tashmë është krijuar një listë e pacientëve që kanë nevojë për kujdesin paliativ, ndërkaq pacientët e tjerë që kanë nevojë për këtë shërbim mund të lajmërohen në çdo kohë tek numrat e telefonit 045 300 723 dhe 045 300 726, në mënyrë që të regjistrohen dhe të përfitojnë nga ky shërbim. /Gazeta Shneta/